Defensa da Sanidade Pública avisa a Feijóo de que cobrar a pacientes comida ou aseo significaría "gravar a enfermidade"

SANTIAGO DE COMPOSTELA, 28 May. (EUROPA PRESS) -

A Asociación Galega para a Defensa da Sanidade Pública advertiu ao presidente da Xunta, Alberto Núñez Feijóo, que empezar a cobrar a pacientes por comida ou asego significaría "crear un novo imposto que grava a enfermidade" a persoas que teñen problemas de saúde "tan graves que requiren hospitalización".

Manifestouno despois de que Feijóo afirmase, nunha entrevista co diario ABC que "darlle a comida e facer a cama a un paciente non é sanidade". Ao respecto, a asociación interpretou estas palabras como "unha mostra máis da loucura política de restrinxir a débeda pública a conta dos cidadáns" que non son "responsables" da crise mentres "inxectan miles de millóns a fondo perdido" en Bankia e outras entidades que son "as auténticas causantes" do desastre.

Dito isto, apuntou que ou ben o xefe do Executivo galego "descoñece" a atención hospitalaria, da que forman parte "consubstancial" a alimentación, o mantemento da hixiene ou a cama, ou quere buscar "escusas alucinantes" para introducir "novos copagamentos".

Así as cousas, advertiu de que cobrar por estes servizos sería "inxusto, insolidario e atentaría contra a esencia" do actual sistema de saúde "racional, universal e equitativo". Ademais, sinalou que aumentaría "as desigualdades" entre os enfermos atendendo ao seu nivel de renda.

"Consideramos surrealista e humillante que moitas persoas hospitalizadas con escasos recursos pola crise deberán levar a súa comida e auga con xabón das súas casas para poder alimentarse ou manter a súa hixiene persoal", remarcaron, antes de volver pedir "o cesamento desta carreira cara ao desmantelamento da sanidade pública galega".