VILAGARCÍA DE AROUSA, 22 Feb. (EUROPA PRESS) -
Axentes da comisaría da Policía Nacional de Vilagarcía detiveron esta madrugada un home duns 40 anos despois de que agredise dous bombeiros que acudiron a sufocar un incendio na vivenda que ocupaba.
O sinistro produciuse nunha casa abandonada do barrio de Trabanca Badiña, habitualmente ocupada polo indixente. Tras recibir unha chamada na que se alertaba do lume desprazouse ata o lugar unha unidade dos Bombeiros do Salnés.
Á súa chegada os dous membros deste corpo foron recibidos co lanzamento de tellas e de anacos de viga por parte do 'okupa', que se atopaba na planta superior, o que lles provocou feridas de carácter leve, se ben un deles tivo que ser atendido posteriormente nun centro hospitalario.
Dada a situación, os bombeiros solicitaron a intervención do corpo da Policía Nacional para reducir o agresor. Os dous axentes desprazados tamén resultaron con feridas de carácter leve no forcexo que se produciu co individuo, que se negaba a desaloxar a vivenda.
Tras a súa detención, o agresor foi posto a disposición xudicial. O titular do xulgado de garda ordenou o seu traslado a un centro psiquiátrico para a súa observación.
Os veciños da zona sinalaron que non era a primeira vez que se producían este tipo de incidentes. Ata o punto en que en máis dunha ocasión presentaran escritos no concello solicitando a intervención municipal para desaloxar ao indixente.
Tamén os bombeiros recoñeceron que non era a primeira vez que acudían a esta vivenda a sufocar incendios provocados polo detido e que nalgunha outra ocasión foran recibidos a pedradas, se ben ata agora nunca resultaran feridos.