Detido un veciño do Porriño tras ser reducido dun disparo por agredir un garda civil cun machado

PONTEVEDRA 20 May. (EUROPA PRESS) -

Un veciño do Porriño (Pontevedra) foi detido este domingo por agredir cun machado na cabeza a un axente da Garda Civil, o que motivo que o agresor fose reducido cun disparo na perna.

Fontes do Instituto Armado informaron a Europa Press que os feitos tiveron lugar ás 5.45 horas deste domingo despois de que unha patrulla da Benemérita procedese a identificar un varón --nacido en xuño de 1980 e veciño de O Porriño-- que deambulaba pola rúa cun machado na man.

Segundo o relato da Garda Civil, ante a "actitude violenta" do agresor e despois de golpear cun machado un axente --que recibiu seis puntos de sutura na cabeza--, un dos compañeiros do agredido realizou un disparo intimidatorio ao aire "que non foi suficiente", polo que procedeu a reducir o individuo cun disparo nunha perna.

O veciño do Porriño xa foi dado de alta tras ser evacuado a un centro médico polo disparo na perna, e atópase no calabozo á espera de pasar a disposición xudicial, acusado de atentado contra a autoridade.

Ao lugar dos feitos tamén acudiu unha parella da Policía Local do Porriño, que colaborou co Instituto Armado. Pola súa banda, o axente ferido da Garda Civil polo golpe do machado xa foi dado de alta.