Aviso: Esta noticia tiene más de un año. Última actualización: 19/09/2008 19:23
Medio centenar de artistas cubrirán mañá durante 13 horas con representacións de Las Meninas de Velázquez as fachadas das vivendas abandonadas e os muros sen uso do barrio ferrolano de Canido, no marco do 'Encontro Artístico de Canido' co que se tratará de "achegar a arte aos cidadáns".
A iniciativa está promovida por Eduardo Hermida e Gustavo Sequeiro, dous artistas que viven na zona e queren transformar un dos barrios máis deteriorados de Ferrol nun lugar "inundado de alegría". A idea xurdiu despois de que o mural artístico que realizara no barrio o coruñés Jorge Cabezas fose cuberto aos poucos días por un veciño que con varias brochadas de pintura realizou unha pintada contra unha antena de telefonía móbil.
O "atentado" contra as "meninas" do pintor coruñés levou os artistas do barrio a formular unha "reinterpretación" do cadro de Diego Velázquez a pintores galegos, que plasmarán as súas obras en 35 fachadas das rúas Alonso López e Estrela, dende as 11.00 horas.
"Cada artista escollerá a casa na que plasma a obra, mentres que os fotógrafos captan o resultado final e os músicos amenizan o encontro", explicou hoxe en rolda de prensa Eduardo Hermida. "Cada un vai en cada edificio algo que lle pode dar pé a crear a súa propia obra, a textura do edificio, a cor da casa, unhas ramas que poidan saír do patio, é dicir, eles mesmos se darán unha volta e poderán decidir cál é o espazo máis axeitado", explicou.
O Concello de Ferrol colabora coa iniciativa achegando 40 quilos de pintura para a realización das obras, subministrando alimentos aos participantes e o equipamento técnico que permitirá a participación de distintas formacións musicais. A iniciativa obrigará a reordenar o tráfico rodado do barrio, con cortes de circulación en distintas vías.