Foto: EUROPA PRESS
O filólogo entra como académico numerario na RAG para ocupar a vacante que se produciu co falecemento de Antonio Gil Merino
SANTIAGO DE COMPOSTELA, 25 Feb. (EUROPA PRESS) -
O filólogo, secretario do consello de la Cultura Galega (CCG) e membro da Real Academia Galega (RAG), Henrique Monteagudo, considerou "unha falacia" a imposición do galego e avogou por "defender, cultivar e promover" o idioma.
Así se pronunciou este sábado no seu discurso 'Facer país co idioma. Sentido da normalización lingüística' co que ingresou na institución como académico numerario para ocupar a vacante que se produciu tras o falecemento do académico numerario Antonio Gil Merino en 2009.
Na súa intervención, o novo membro da institución reflexionou sobre "a grave crise" que "sofre a lingua galega", un "cataclismo que se inscribe noutro moito máis amplo" e que está a dar lugar "a un modelo económico, social e cultural" que "ameaza con engulir as conquistas de traballadores, vincular á escravitude á maioría do xénero e destruír definitivamente o patrimonio cultural do que forma parte inseparable a diversidade lingüística".
Así mesmo, cualificou de "falacia" a contraposición entre "normalización do galego e liberdade lingüística". "É unha falacia que nace tanto dunha serie de malentendidos da primeira como de lecturas tendenciosas da segunda", sentenciou.
LIBERDADE E NORMALIZACIÓN
Fronte a isto, asegurou que a "liberdade lingüística é unha condición esencial da normalización", do mesmo modo que a normalización é condición esencial da liberdade lingüística". Así, puntualizou que a normalización "ben entendida" ten como obxectivo establecer "as condicións do exercicio da liberdade dos falantes".
"A imposición do galego é unha falacia. Se o galego é un dereito fundamental en Galicia, carece de sentido falar de imposición do galego o seu territorio", asegurou antes de sinalar que, "o que en realidade acontece é que hai persoas e estamentos sociais que aspiran a vivir e desenvolverse en Galicia ignorando a súa lingua".
ACADÉMICO NUMERARIO
O secretario da RAG, Xosé Luis Axeitos, foi o encargado de abrir o acto, coa lectura da certificación do acordo no que se determinou a celebración da sesión de ingreso do profesor; mentres que, a académica numeraria Rosario Álvarez Blanco respondeu, en nome da institución, ao discurso pronunciado por Monteagudo.
Ao acto acudiron, entre outras autoridades, o coselleiro de Cultura, Educación e Ordenación Universitaria, Jesús Vázquez; o secretario xeral de Cultura, Anxo Lorenzo; e o secretario xeral de Política Lingüística, Valentín García; os membros da academia; diversas personalidades da cultura galega e políticos como os deputados socialistas Francisco Cerviño ou Xaquín Fernández Leiceaga.