O PPdeG acepta a proposta de cambios no voto emigrante do PSdeG, porque é a súa postura "dende hai tempo"

SANTIAGO DE COMPOSTELA 22 Feb. (EUROPA PRESS) -

O voceiro da área institucional do Grupo Parlamentario Popular, Antonio Rodríguez Miranda, deu este mércores a "benvida" ás propostas do PSdeG para reformar o sistema de participación electoral dos emigrantes, co fin de que estes non teñan que pregar o voto, tras aseverar que o seu partido "defende dende hai tempo" estas modificacións.

Así, a través dun comunicado, saíu ao paso das declaracións da deputada socialista Marisol Soneira, quen formulou a posibilidade de crear circunscricións electorais no exterior, para destacar que "a única novidade" desta proposta é "a asunción" da postura do PP.

"Hai que darlle a benvida a unha posición máis acorde co que de verdade demandan os emigrantes para exercitar o seu dereito a voto, pero que é sensiblemente diferente á que se aprobou contando coa maioría socialista nas Cortes Xerais", remarcou, en alusión á última da reforma da Lei Orgánica do Réxime Electoral Xeral (Loreg) aprobada por PSOE, PP, CiU e PNV.

Para xustificar a súa reacción, Miranda apuntou que, no último congreso do PP, se aprobou unha emenda do presidente da Xunta, Alberto Núñez Feijóo, para modificar a norma tendo en conta que o voto dos emigrantes debe facerse "en urna" e "de forma directa" tras a presentación dun documento oficial ou por correo, logo de solicitude, ao igual que acontece en España.

"Dende o PP sempre defendemos a necesidade de dignificar o voto dos emigrantes, que sexa totalmente transparente, por o que consideramos esencial que se leve a cabo nas mesmas condicións e coas mesmas garantías que en España", incidiu o popular, quen non desbotou "a adopción de novas formas a través dos sistemas telemáticos".

Ao PSOE "CHEGOULLE A INSPIRACIÓN"

A maiores, o deputado do PPdeG opinou que "o paso á oposición" serviu aos socialistas para que "lles"chegase a inspiración e o sentido común" no relativo ao voto dos residentes ausentes.

"Só nos queda saber se a proposta defendida agora pola deputada socialista conta de verdade co aval do seu partido a nivel nacional", incidiu Miranda, convencido de que iso suporía "recoñecer o acerto das propostas formuladas polo PP co obxectivo de garantir o dereito a voto dos emigrantes nas mesmas condicións que os residentes en territorio nacional".