David Guardado ye'l vicepresidente nuevu de l'Academia de la Llingua Asturiana

EUROPA PRESS - Archivo

UVIÉU 26 Oct. (EUROPA PRESS) -

La Xunta Ordinaria de l'Academia de la Llingua Asturiana escoyó esti miércoles al filólogu xixonés David Guardado como vicepresidente de la institución.

El nomamientu de Guardado, cola única candidatura presentada a esti cargu, produzse depués de la dimisión de la vicepresidenta anterior, la escritora Marta Mori, que dexó'l puestu pa presentase nes llistes d'IX al Conceyu de Xixón.

David Guardado (Xixón, 1970) llega a la Xunta de Gobiernu de l'ALLA namás cinco meses depués d'entrar na institución como miembru de númberu.

L'autor de 'Nunca vencida', ún de los llibros asturianos más vendíos anguaño, ye llicenciáu en Filoloxía Inglesa, diplomáu n'Estudios Avanzaos en Filoloxía y Especialista Universitariu en Llingua Asturiana. Amás, ye pioneru na presencia d'esti idioma n'internet, autor de dellos artículos y del ensayu 'Llingua estándar y normalización llingüística' y ún de los fundadores de l'asociación 'Reciella-Families pol Asturianu'.

La Xunta de Gobiernu de l'Academia de la Llingua Asturiana, que va tar vixente hasta xunu del 2025, sigue presidida por Xosé Antón González Riaño, con Xosé Ramón Iglesias Cueva como secretariu, Carmen Muñiz como vicesecretraria y Carlos Lastra como tesoreru.