Lucía Herrera presenta nel FIC el so llargumetraxe 'Subir al cielo', rodáu dafechu n'Asturies

UNIFILM

UVIÉU, 21 de Payares (EUROPA PRESS)

La directora asturiana Lucía Herrera presenta esti vienres, nel marcu del Festival Internacional de Cine de Xixón, la so película 'Subir al cielu', rodada dafechu n'Asturies y autoproducida, sin cuntar con nengún tipu d'ayuda económica. Va ser a les 20.15 hores nel teatru de la Universidá Llaboral de Xixón.

Según espliquen los responsables de la obra fílmica, al traviés d'una nota prensa, trátase d'una película rodada dafechu n'Asturies, con más de 30 llocalizaciones esteriores y qu'afonda nes relaciones personales. Asina, los sos personaxes busquen afayar la so identidá, la seguridá y les respuestes, pero sobremanera, afayase a sí mesmos.

Murias (Rosalía Regueru), Lois (Verónica Castro), Deva (Mónica Vacas) y Longrey (Enrique Gutiérrez) viven la so vida dientro de contradicciones inevitables: la edá, el pasu'l tiempu, la materno-paternidá. Amistá y relaciones de pareya ente decisiones intermitentes. Too ello cola perspectiva xeneracional que repasa les relaciones a los 20, 30 y 40 años. En palabres del so guionista, 'Subir al cielo' "ye una película que fala de muyeres que quieren subir al cielu y d'homes que quieren saber qué significa subir al cielu".

La directora Lucía Herrera debuta con esti filme nel llargumetraxe de ficción, xunto con Juan Luis Ruiz, amigu, codirector y director de fotografía. Cita ente les sos referencies cinematográfiques 'Deseando amar' y '2046', de Wong Kar-Wai, 'El Sur' de Víctor Erice, escritores como Julio Cortázar, Vila-Matos y John Berger, y los directores de fotografía Cristopher Doyle y el mesmu Juan Luis Ruiz.

Na ellaboración d'esta película apoyáronla Lucía Costa, como xefa de producción, y Salomé Martínez y Marta Santiago, como directores de producción.

AUTOPRODUCCIÓN

'Subir al cielo', según espliquen los mesmos realizadores, ye un proyectu d'estructura y presupuestu minimalistes, que trata de romper coles convenciones de la industria cinematográfica. Nun cuenta con ayuda pública dalguna, pero llogró texer una rede d'entidaes qu'apoyen el proyectu ofreciendo los sos espacios, servicios o productos. Realizada baxo llicencia Creative Commons, cada miembru del equipu de trenta persones entrega una pequena parte pa producir un gran too. Internet, les nueves formes de distribución y les redes sociales van conformar la esperiencia S.A.C.-acrónimu del títulu- más allá de la gran pantalla.

COLLABORACIONES

La película cuenta cola collaboración d'Elle Belga y Nacho Vegas, quien interpreta'l papel de Vigo. Amás d'actuar, el xixonés toca xunto cola so banda'l cantar 'La ciudá más triste', con lletra adaptada a la historia de los protagonistes.

Y ye que la música de 'Subir al cielo' ye la so propia xénesis, constrúi espacios y personaxes colos cantares del propiu Nacho Vegas, Elle Belga, The School, Love of Lesbian, La bien querida, Kitten Cake, etc., y la fisicidá d'una fotografía que mos ubica dientro de la historia.