Macron en cabeza pa la primer vuelta, pero con una astencion del 30%

PARÍS, 18 d'Abril (Reuters/EP)

El candidatu independiente Emmanuel Macron asítiase en cabeza de cara a la primer vuelta de les elecciones presidenciales del 23 d'abril con un puntu de ventaya sobre la so más directa rival, la líder del Frente Nacional, Marine Le Pen, según dos sondeos publicaos esti martes.

Acordies col sondéu d'Ifop-Fiducial pa 'Paris Match' y Sud Radio, l'exministru d'Economía cuenta con un apoyu del 23 por cientu, frente al 22 per cientu de Le Pen.

En tercer posición, col 19,5 por cientu, asítiase'l candidatu izquierdista Jean-Luc Mélenchon, qu'esperimentó un claru ascensu na recta final de la campaña, adelantando al candidatu conservador François Fillon, que quedaría nel 19 por cientu. Bien de lloñe síguenlos Benoît Hamon, el candidatu socialista, col 8 por cientu.

Per otra parte, el sondéu, realizáu sobre una muestra de 1.851 persones ente'l 14 y el 15 d'abril, asitia nel 30 por cientu l'astención prevista pa la primer vuelta, polo qu'ésta diba ser en realidá la opción más votada.

Un segundu sondéu d'Opinionway asitia a Macron tamién nel 23 por cientu (un puntu más) y a Le Pen nel 22 por cientu, siguíos nesti casu por Fillon, col 20 por cientu (un puntu menos) y Mélenchon, col 19 por cientu (un puntu más).

Tocantes a la segunda vuelta, según esta encuesta, Macron impondríase a la líder del Frente Nacional pol 64 por cientu de los votos frente al 36 por cientu. De ser Fillon el que pasara a segunda vuelta xunto a Le Pen, ésti ganaría col 58 por cientu de los votos.