Muerre l'escritor y políticu Jorge Semprún

MADRID, 7 de Xunu (EUROPA PRESS)

L'escritor, intelectual y políticu Jorge Semprún morrió esti martes na so casa de París a los 87 años d'edá, según confirmaron a Europa Press fontes cercanes al entornu familiar.

Semprún (Madrid, 1923), ministru de Cultura ente 1988 y 1991 nel gobiernu de Felipe González, cuenta con una prollongada obra lliteraria de fuerte componente autobiográficu, na que cavilga sobre los fechos más importantes del sieglu XX n'España y n'Europa.

La Guerra civil obligó a la so familia a refuxase en Francia y dirixise a La Haya, onde'l so padre trabayaba al serviciu de la República. Instalóse en París en 1939 y, comprometíu yá col comunismu, lluchó na Resistencia contra la ocupación alemana. Detuviéronlu en 1943 y deportáronlu a un campu de concentración alemán.

Esti confinamientu de 15 meses nel campu de concentración de Buchenwald mientres la Segunda Guerra Mundial dexó-y una fonda buelga, anque nun va ser hasta los sos últimos llibros, ('La escritura y la vida' y 'Viviré con su nombre, morirá con el mío', cuando va falar sobre estos fechos.

Dempués de la so lliberación, en 1945, tornó nun miembru destacáu del Partíu Comunista español (PCE) nel exiliu. Baxo'l nomatu de 'Federico Sánchez' foi un activu axente clandestín na España franquista, anque en 1964 espulsáronlu del partíu por discrepancies cola llinia oficial. Ente 1988 y 1991 nomáronlu ministru de Cultura nel gobiernu socialista de Felipe González.

Ente les sos noveles destaquen 'El largo viaje', centráu nos sos díes como miembru de la Resistencia francesa, 'Aquel Domingo', onde analiza la dialéctica marxista y el nacimientu y ocasu de les ideoloxíes nel sieglu pasáu, o 'Autobiografía de Federico Sánchez', obra que se nutre de la so esperiencia como militante comunista na clandestinidá y de la so actividá mientres los últimos años del franquismu y la transición española.

Con esta obra Semprún algamó en 1978 el Premiu Planeta. La so última creación, 'Federico Sánchez se despide d'ustedes', relata la so esperiencia como responsable del Ministeriu de Cultura.

La so obra lliteraria, de fondos raigaños autobiográficos, mereció, ente otros, los premios Formentor (1964), Planeta (1977), Fémina (1969 y 1994), el Premiu de la Paz de los llibreros alemanes (1994), el Jerusalén (1997), el Premiu Nonino (1999), la medaya Goethe (2003), la Fundación Lara (2003), l'Annetje Fels-Kupferschmidt (2006) y el Terenci Moix (2010).

La prolífica producción lliteraria de Jorge Semprún inclúi, ente otres, obres como 'Netchaiev volvió' (1988), 'La escritura o la vida' (1995), 'Adiós, luz de veranos' (1998), 'Aquel domingo' (1999), 'Viviré con su nombre, morirá con el mío' (2001), 'Veinte años y un día' (2003), 'El largo viaje' (2004), 'El hombre europeo' (2005) o 'Pensar en Europa' (2006).