El 'violador del estilete' niega los fechos y afirma que curiaba de la víctima

UVIÉU, 16 Sep. (EUROPA PRESS) -

El conocíu como 'violador del estilete' negó ser el culpable d'una agresión sexual y robu a una muyer con discapacidá. L'acusáu negó los fechos y afirmó que curiaba muncho a la víctima y que taba mui pendiente d'ella.

Asina lo esplicó en declaraciones a Europa Press l'abogada del Centru d'Atención a Víctimes d'Agresión Sexual y Malos Tratos (Cacasym), Ana María González, depués del xuiciu celebráu esti llunes a puerta zarrada n'Uviéu.

La Fiscalía sigue considerando que los fechos son constitutivos d'un delitu d'agresión sexual, polo que caltién la solicitú de 11 años y seis meses de prisión pal acusáu.

Esti xuiciu suspendióse en xunu pola ausencia de trés testigos que solicitara la defensa, ún d'ellos un policía que llamaren pa ratificar un informe.

La víctima, nacida en 1992, tien trestornu de l'afectividá por trestornu depresivu recurrente d'etioloxía sicóxena, alteración de la conducta por trestornu obsesivu compulsivu de la personalidá d'etioloxía idiopática y trestornu mental por trestornu somatoforme d'etioloxía idiopática.

El Ministeriu Fiscal sostién que, n'avientu de 2017, l'acusáu convivía cola víctima nun pisu asitiáu n'Uviéu, en réxime d'arriendu d'habitaciones. Por esta circunstancia principió una rellación d'amistá con ella y yera conocedor de que tien una discapacidá síquica del 65%.

El 'violador del estilete', aprovechando la rellación cola muyer, acompañóla en dalguna ocasión a la consulta del siquiatra. Tamién acompañaña a visitar al so güelu a la residencia xeriátrica y tamién hasta'l pisu propiedá d'esti n'Uviéu, que taba ensin xente naquellos momentos y del qu'ella tenía les llaves.

Según el rellatu del fiscal, sobre les 12.30 hores del día 22 d'avientu de 2017, cuando la víctima taba echada durmiendo na so habitación del pisu nel que vivíen, l'acusáu entró y empezó a toca-y los pechos.

Al ver que s'espertara, el procesáu, en diciéndo-y "vamos tener rellaciones sexuales, quiéraslo tu o non", empezó a baxa-y los pantalones y la ropa interior. Anque ella dicía-y que non y que saliera de l'habitación, el procesáu, suxetóla fuertemente y dixo-y que si nun taba quieta diba matala, agredióla sexualmente, depués de lo qu'abandonó l'habitación diciéndo-y: "Si dices dalgo, mátote".