Xulio Ferreiro quita ferro a ser el quen represente a Galicia en Madrid no peche de Unidos Podemos

SANTIAGO DE COMPOSTELA 22 Jun. (EUROPA PRESS) -

O alcalde da Coruña, Xulio Ferreiro, quitou ferro a ser quen acuda ao acto de peche de Unidos Podemos a Madrid o próximo venres como representante dos alcaldes 'do cambio' en Galicia, e manifestou que o entende como un recoñecemento a todos os gobernos das mareas.

"Sento moi contento, moi contento cada vez que Martiño (Noriega), Jorge (Suárez), ou os deputados de En Marea se referencian no goberno da Coruña como un goberno do cambio, ou cada vez que o fai Xosé Manuel Beiras ou o fai Pablo Iglesias ou Íñigo Errejón. Eu creo que é capital político que podemos poñer enriba da mesa nestes momentos os tres concellos da provincia da Coruña e os do resto do Estado", expresou ao ser preguntado polo convite que Unidos Podemos fíxolle para acudir ao peche de Madrid o venres.

Así mesmo, engadiu que a relación política que ten con En Marea e co resto das candidaturas de confluencia é de "cooperación e compañeirismo". "Polo tanto, cando un compañeiro presume dun, eu encantado porque todos os que estamos sentados na mesa somos compañeiros e traballo para eles, como entendo que eles traballan para nós, porque o obxectivo é un", apostilou.

Á pregunta de por que se elixiu un único alcalde, Xulio Ferreiro chanceou con que "haberá que deixar alguén en Galicia". "A min mándanme de embaixador e o resto quedan aquí, ¡ogallá puidésemos estar en dous sitios á vez!", expresou Ferreiro, antes de aclarar que "os liderados son corais e non se trata de referencias persoais, senón que a referencia do cambio en Galicia é colectiva".

Por outro lado, e preguntado por se será o candidato á Xunta, Xulio Ferreiro foi rotundo cun "non". "Esta seima", dixo en broma sobre a resposta á pregunta, antes de engadir que non lle parecía "serio despois dun ano" nunha responsabilidade como a que ten á fronte do Concello da Coruña.

Así, e aínda que dixo que le "afaga" que se fale del como un referente para encabezar a lista de confluencia para as galegas, asegurou que vai cumprir co seu mandato. "E se poden ser oito, non serán catro", sentenciou.