UVIÉU, 20 Jun. (EUROPA PRESS) -
L'aumentu del porcentaxe de centros nos que s'imparte llingua asturiana y d'alumnáu qu'escueye l'asignatura nos centros concertaos foi "bultable" nel últimu cursu, con un 81% de centros nos que yá s'imparte la materia.
Asina se recueye nuna respuesta per escritu del conseyeru d'Educación y Cultura, Genaro Alonso, a la entruga de la diputada d'IX, Concha Masa, sobre'l grau de cumplimientu de los compromisos de investidura en materia d'identidá, llingua y cultura asturiana y les perspectives hasta'l final de la Llexislatura.
Na respuesta, a la que tuvo accesu Europa Press, señalaron que cola recuperación de la campaña de matriculación en centros concertaos, acompañada de la visita de técnicos de la Conseyería a los colexos, xuntes cola dirección y colos padres y madres, consiguióse un aumentu del porcentaxe de los centros concertaos onde pue cursase llingua asturiana.
Per otru llau, dende l'Executivu autonómicu tamién resaltaron como novedaes la negociación col anterior Ministeriu d'Educación y Cultura pa la reconocencia y creación de la Especialidá Docente del Profesoráu de Llingua Asturiana y Lliteratura.
Asina, formóse un grupu de trabayu col Ministeriu p'algamar un alcuerdu de cambiu de los reales decretos pa crear la especialidá de Llingua Asturiana y Lliteratura. Les negociaciones col Executivu de Mariano Rajoy nun frutiaron, pero l'alcuerdu podría llegar no que queda de llexislatura gracies a la moción de censura que llevó a Pedro Sánchez a La Moncloa.
Y ye que'l presidente actual llegó a mostrase a favor de la oficialidá del asturianu nuna visita a la rexón y la ministra d'Educación nueva, Isabel Celaá, ye una defensora del multillingüismu, lo que podría allanar el camín a la especialidá d'asturianu.
Per otru llau, dende'l Gobiernu asturianu tamién destacaron l'adaptación del asturianu al Marcu Européu de Referencia pa les Llingües. Nestos momentos ta tramitándose el decretu al traviés del que van establecese les pruebes que van certificar la conocencia de la Llingua Asturiana nos niveles A1, A2, B1, B2 y C1.
Tamién destacó Alonso la puesta en marcha del Plan pilotu del Asturianu y la incorporación al segundu ciclu d'Educación Infantil de la enseñanza de la llingua propia, que ta en fase de tramitación y que yá foi aprobada pol Conseyu Escolar del Principáu.
Per otru llau, el Principáu unvió una carta a les editoriales pa que los llibros de testu tuvieren un tratu "afayadizu" de la llingua asturiana. Amás, realizóse una comunicación esplícita coles editoriales nes que se detectaron erros sobre la situación social o naturaleza de la Llingua Asturiana.
TOPONIMIA Y RTPA
El conseyeru tamién destacó que no que llevamos de llexislatura aprobóse la toponimia de siete conceyos --Candamo, Tapia, Tinéu, Sotu'l Barcu, Peñamellera Baxa, San Tiso d'Abres y Villayón--. Amás, bien ceo van aprobase los informes d'otros siete --Llanera, Castropol, Les Regueres, Onis, Somiedu, Cabrales y Uviéu--, y tán en distintes fases del procesu otros diez.
Namás un conceyu --Eilao-- nun empecipió'l procesu, anque dende la Conseyería indicaron que lo va facer en feches próximes. Per otru llau, existe una collaboración col Serviciu de Cartografía pa la ellaboración del Nomenclátor Xeográficu Nacional.
Na respuesta d'Alonso tamién se destaca una "medría considerable" de la traducción de documentos dientro de l'alministración y l'analís y actualización de datos toponímicos del Institutu Nacional Xeográficu pa que pueda aportase a ellos dende cualquier puestu alministrativu.
Tamién s'apunta a una visibilización de la realidá llingüística asturiana nel conxuntu del Estáu gracies a la participación d'Asturies en dellos seminarios y congresos de llingües minoritaries.
P'acabar, na amplia respuesta d'Alonso a Concha Masa tamién se recueye que se caltuvieron relaciones y xuntes cola dirección de la RTPA "na busca de calces p'ampliar y llograr una programación con un usu normalizáu de la llingua asturiana".
Nesi sentíu, dende la Conseyería d'Educación y Cultura señalaron qu'en RTPA va aumentándose de "forma gradual" la presencia normalizada del asturianu.
