Ahmadineyad pue enfrentase a una pena de 74 llatigazos

EUROPA PRESS/CUBADEBATE

MADRID, 13 de Mayu (EUROPA PRESS)

El presidente d'Irán, Mahmoud Ahmadineyad, podría afrontar una condena de 74 llatigazos, en casu de que lu declaren culpable de violar les normes electorales, según informó l'organismu de control electoral del país, citáu pola cadena de televisión emiratina Al Arabiya.

Concretamente, el Conseyu de los Guardianes considera qu'Ahmadineyad podría violar les lleis electorales por acompañar esti sábadu al so exxefe de gabinete Esfandiar Rahim Mashaie a rexistrase nel Ministeriu d'Interior como candidatu pa les elecciones del próximu 14 de xunu.

Acordies cola axencia Reuters, Mashaie aseguró que'l presidente acompañáralu porque tenía "el día llibre". Sicasí, según un informe publicáu esti llunes pol diariu dixital 'Jabar', el mandatariu "presentara a un individuu como un candidatu pa les elecciones".

El Conseyu de Guardianes acordó unánimemente que "les acciones del presidente al presentar a un individuu como un candidatu electoral constitúin una violación y son delitu", según informó Abbas Alí Kadjodai, un voceru d'esti órganu encargáu d'aprobar toles solicitúes de los candidatos.

"Informemos a la xusticia de los fechos", declaró Kadjodai al diariu. La llei electoral iranina prohíbe que tanto l'Estáu como los sos representantes utilicen el so poder a favor o en contra de cualquier candidatu.

Los conservadores ven con rocea a Mashaie, al qu'acusen de liderar "una corriente esviada", que pretende apostrar al cleru del poder en beneficiu d'una doctrina más nacionalista, indicó Al Arabiya. Acordies con medios llocales, la condena podría ser d'un máximu de seis meses de cárcel o 74 llatigazos.