Associated Press acusa al Gobiernu d'EEUU d'espiar a los sos periodistes

WASHINGTON, 14 de Mayu (EUROPA PRESS)

L'axencia de noticies Associated Press (AP) informó que, ente los rexistros de llamaes de les 20 llinies telefóniques investigaes pol Gobiernu estaounidense, figuren los llistaos de les comunicaciones de cinco periodistes y un redactor xefe que participaron na ellaboración d'una noticia sobre una operación de la CIA qu'atayó un atentáu d'Al Qaeda contra un avión con destín a Estaos Uníos. Una información que provocó que l'Alministración intentara averiguar les sos fontes na publicación d'esos datos.

Nuna información publicada na so páxina web oficial, AP sorrayó que'l Gobiernu tovía nun esplicó por qué motivu llogró los rexistros de les llamaes telefóniques y recordó que'l Gobiernu almitió que ta llevando a cabu una investigación criminal p'averiguar la fonte o les fontes d'una noticia que l'axencia publicó'l 7 de mayu del 2012 sobre una operación de la CIA qu'atayó un atentáu d'Al Qaeda contra un avión con destín a Estaos Uníos, una noticia que desveló "detalles" del operativu d'esta axencia d'Intelixencia.

"Los fiscales buscaron rexistros telefónicos de reporteros n'anteriores causes pero'l tamañu d'esta investigación nuna amplia selección d'oficines d'AP, incluyíos númberos de la centralita xeneral y llinies de fax compartíes por delegaciones, ye estraordinariu", alvirtió

AP definió la interceptación de los rexistros de les llamaes de 20 de les sos llinies telefóniques ente abril y mayu como una "intromisión masiva y sin precedentes", y indicó qu'esta acción del Departamentu de Xusticia pue afectar a les comunicaciones telefóniques de "más de cien periodistes", que trabayen nes delegaciones investigaes pol Gobiernu.

"El númberu exactu de periodistes qu'usaron les llinies telefóniques mientres esi periodu desconoz pero más de 100 periodistes trabayen nes oficines nes que los rexistros de llamaes arrexuntáronse, nuna serie de noticies sobre'l Gobiernu y otres temes", afirmó AP.

Nuna carta de protesta enviada al fiscal xeneral estaounidense, Eric Holder, esti llunes, en teniendo conocencia de la investigación de les sos comunicaciones telefóniques, el presidente y director executivu d'AP, Gary Pruitt, acusó al Gobiernu de llograr información más allá de cualquier llenda xustificada por "cualquier investigación", y reclamó la devolución de los rexistros de llamaes y la destrucción de toles copies d'estos documentos.

"Nun pue haber una xustificación posible pa una escoyeta tan amplia de comunicaciones telefóniques d'AP y los sos reporteros. Estos rexistros releven potencialmente les comunicaciones con fontes confidenciales en toles actividaes periodístiques d'AP, mientres un periodu de dos meses, aporten una fueya de ruta sobre les operaciones periodístiques d'AP, y revelen información sobre les actividaes y operaciones d0AP que'l Gobiernu nun tien nengún derechu a conocer", sorrayó Pruitt na so misiva.