UVIÉU, 27 de Xineru (EUROPA PRESS)
La Conseyería d'Educación y Cultura pidió al secretariu del Ministeriu d'Educación qu'especifique en base a qué norma se deniega la reconocencia de la especialidá docente de 'llingua' asturiana, como defende l'executivu autonómicu.
En declaraciones a los medios mientres un actu nel Muséu de Belles Artes, la conseyera d'Educación, Ana González, consideró que la negativa espresada pol ministru del ramu, José Ignacio Wert, a reconocer la especialidá tien un calter ideolóxico.
Asina, afirma que na comunicación que recibió del Ministeriu "nun se da nenguna razón llegal, namás mos dicen que l'asturianu nun ye oficial, pero nun mos dicen en base a qué normativa nun puen da-y l'estatus d'especialidá". Por esti motivu, González anunció que la Conseyería va adoptar "una vía más alministrativa", y va acudir "al secretariu del Ministeriu, pa qu'esplique en base a qué norma lo deniega". "Y nel casu de que nun haya norma y seya daqué que tenemos que desarrollar na comunidá, que mos digan en base a qué norma lo tenemos que facer", añedió.
Recordó que la Llei de Promoción y Usu del Asturianu ampara y manda la creación d'esta especialidá, una midida que consideró "bien importante" pa poder realizar convocatoria oficial de places de profesor d'asturianu nes oposiciones y nos concursos de treslláu, "como pasa en cualquier otra asignatura".
