Los consumidores de mariguana tienen un meyor control del azucre nel sangre

MADRID, 15 de Mayu (EUROPA PRESS)

Los consumidores de mariguana tienen niveles d'insulina n'ayunes un 16 por cientu más baxos en comparación colos non usuarios. Una investigación publicada en 'American Journal of Medicine' detectó que los usuarios actuales de mariguana tienen significativamente más baxos los niveles d'insulina n'ayunes y menos probabilidaes de ser resistentes a la insulina, hasta dempués d'escluyir a los pacientes con diagnósticu de diabetes mellitus.

La mariguana (Cannabis sativa) utilizóse mientres sieglos pa solliviar el dolor, meyorar l'estáu d'ánimu y aumentar la fame. Illegal n'Estaos Uníos dende 1937, el so usu social sigue aumentando, con unos 17,4 millones d'usuarios actuales y 4,6 millones que la furman a diario o casi a diario, y la opinión pública ta posicionándose a favor del so usu melecinal. Una forma sintética del so ingrediente activu, el tetrahidrocannabinol, comúnmente conocíu como THC, yá s'aprobó pal tratamientu de los efectos secundarios de la quimioterapia, l'anorexa inducida pol sida, estomagaes y otres condiciones médiques.

Cola reciente llegalización de la mariguana recreativa en dos estaos y la llegalización de la mariguana melecinal en 19 estaos y el Distritu de Columbia, los médicos cada vez alcuentren más consumu de mariguana ente les sos poblaciones de pacientes.

Un equipu d'investigación multicéntricu analizó los datos llograos na Encuesta Nacional de Salú y Nutrición (Nhanes) ente'l 2005 y el 2010. Los investigadores estudiaron los datos de 4.657 pacientes que completaron un cuestionariu de consumu de drogues y dellos, 579 yeren usuarios actuales de mariguana, 1.975 tomaren mariguana nel pasáu, pero nun la consumíen nesti momentu, y 2.103 nunca fumaren o inxirieren mariguana.

La insulina n'ayunes y la glucosa midiéronse al traviés de muestres de sangre y calculóse el modelu d'evaluación de la homeostasis de la resistencia a la insulina (HOMA-DIR) pa evaluar la resistencia a la insulina. Los participantes que fumaron mariguana mientres l'últimu mes teníen menores niveles d'insulina n'ayunes y HOMA-IR y mayores niveles de colesterol de lipoproteínes d'alta densidá (HDL-C).

Estes asociaciones fueron más débiles ente los que reportaron consumir mariguana polo menos una vez, pero non nos últimos trenta díes, lo que plantega qu'existe un impactu del consumu de mariguana na insulina, y la resistencia a la insulina mientres periodos d'usu recién. Los usuarios actuales teníen niveles d'insulina n'ayunes un 16 por cientu más baxos que los participantes qu'informaron nun consumir mariguana en tola so vida. Tamién hubo asociaciones significatives ente'l consumu de mariguana y pequeñes circunferencies de la cintura (una amplia circunferencia de la cintura tamién ta rellacionada col riesgu de diabetes).

"Los estudios epidemiolóxicos previos alcontraron una menor prevalencia de la obesidá y la diabetes mellitus nos consumidores de mariguana en comparanza coles persones que nunca fumaron mariguana, lo que plantega una relación ente los cannabinoides y los procesos metabólicos periféricos, pero'l nuesu ye'l primer estudiu qu'investiga la relación ente l'usu de mariguana y la insulina n'ayunes, la glucosa y la resistencia a la insulina", diz l'investigador principal, Murray A. Mittleman, de la Unidá d'Investigación d'Epidemioloxía Cardiovascular nel Centru Médicu Beth Israel Deaconess, en Boston (Estaos Uníos).