Deteníu un carniceru qu'amenazó con un machete a un compañeru

UVIÉU, 13 de Mayu (EUROPA PRESS)

Un trabayador d'una conocida carnicería n'Uviéu resultó deteníu por amenaces graves tres tirase a por un compañeru con un machete de grandes dimensiones. Según informa la Policía, otros compañeros torgaron que la cosa fuera a más nun conflictu qu'entamó por una simple discusión de trabayu.

Foi ante la necesidá urxente d'espachar dellos pidíos a los repartidores, cuando un trabayador requirió al deteníu que se diera más priesa y procediera a espiezar unes partes d'unos gochos. Contestó-y que nun lo diba faer, porque nun disponía de les pieces que-y pidía desgüesar. El so compañeru contésto-y que les pieces taben colgaes detrás d'él y entós respondió-y con insultos y espresiones fuera de tonu.

Ante esa reacción, el primeru de los trabayadores dirixóse al so xefe pa conta-y lo asocedío, que reprochó al home la so conducta. A ésti nun-y sentó nada bien y, fuera de sí dafechu, según la información de la Policía, dirixóse hacia'l so compañeru amenazándolu con "espiezalu", igual qu'a los "gochos" que taba cortando, según manifestaciones de testigos. Al tiempu, ximelgaba un gran machete y tirábase a por l'aludíu, teniendo que suxetalu los sos compañeros que llograron arrampuña-y l'arma.

El perxudicáu solicitó permisu pa poder ausentase, ante l'estáu de nerviosismu que s'alcontraba pa recibir asistencia mélica, y de siguío, dirixóse a comisaría pa denunciar los fechos.