La facturación de la industria cai un 10,3% en marzu

MADRID, 16 de Mayu (EUROPA PRESS)

La cifra de negocios de la industria reculó un 10,3% en marzu sobre'l mesmu mes del 2012, mientres que les entraes de pidíos del sector baxaron un 13,9% en tasa interañal, según datos publicaos esti xueves pol Institutu Nacional d'Estadística (INE).

Col datu de marzu, la facturación de la industria encadena cinco meses siguíos de descensos, mientres que los pidíos sumen trés meses en negativo.

La cifra de negocios de la industria afondó en marzu la so cayida interañal en más de trés puntos sobre'l mes de febreru (-7%), en cuantes que los pidíos del sector ampliaron en más d'ocho puntos el so descensu interañal en comparanza col mes anterior (-5,7%).

Correxíu l'efectu calendariu y la estacionalidá, la cifra de negocios de la industria baxó un 1,4% en marzu en tasa interañal, meyorando'l descensu interañal de febreru (-2,8%), mientres que los pidíos del sector baxaron un 6,8%, frente al -2,8% del segundu mes del añu.

En términos mensuales (marzu sobre febreru) y escluyendo la estacionalidá y l'efectu calendariu, la facturación de la industria aumentó un 0,6% nel tercer mes del añu, frente al descensu del 0,4% esperimentáu en febreru. Pela so parte, les entraes de pidíos baxaron en marzu un 1,6% al respecto de febreru, tres la meyora del 0,2% rexistráu nel mes anterior.

Tolos sectores industriales retayaron la so facturación nel tercer mes del añu. El mayor retayu de ventes anotáronlu los bienes de consumu duraderu (-15,9%), siguíu de los bienes entemedios (-12,4%), la enerxía (-12,2%), los bienes de consumu non duraderu (-8,9%) y los bienes d'equipu (-7,2%).

Según el mercáu al que se factura'l productu, los datos del INE muestren una meyora del 5,9% na cifra de negocios de la zona non euru y un descensu del 8,4% na de proveniente de los países que comparten la moneda única. Nel mercáu interior, pela so parte, rexistróse una cayida de la facturación del 15,1%.

LOS PIDÍOS AFONDEN EL SO RETROCESU

Pela so parte, la entrada de pidíos de la industria baxó un 13,9% en marzu en comparanza col mesmu mes del 2012. Por sectores, l'únicu qu'esperimentó una tasa positiva interañal foi la enerxía (+0,2%), mientres que los bienes d'equipu, los bienes de consumu duraderu, los bienes entemedios y los bienes de consumu non duraderu baxaron un 22,3%, un 20,9%, un 14,3% y un 10,7%, respectivamente.

Según el mercáu del que se reciba'l pidíu, el de la zona non euru esperimentó un descensu del 22,4%, mientres que los pidíos recibíos de los países cola moneda única baxaron un 9,1%. El mercáu interior, pela so parte, reculó un 14,5% en tasa interañal.

Por comunidaes autónomes, toes retayaron la facturación del so sector industrial en marzu. Los mayores descensos correspondieron a Murcia (+22,7%) y Estremadura (+21,9%), mientres que los descensos menos pronunciaos anotáronlos Canaries (-2,3%) y Aragón (-6,5%).

Tocantes a los pidíos, toles autonomíes presentaron retayos interañales nel tercer mes del añu, nun siendo Castiella-La Mancha, que los elevó un 12,9%. Les mayores cayíes rexistráronles Madrid (-33,8%), Cantabria (-29,3%) y País Vascu (-25,3%), mientres que les menores diéronse n'Asturies (-0,8%) y Canaries (-1,6%).