IU llamenta que'l Gobiernu asturianu vete la Llei de Función Social de la Vivienda que'l PSOE apoya n'Andalucía

UVIÉU, 15 de Mayu (EUROPA PRESS)

El coordinador d'IU d'Asturies, Manuel Orviz, llamentó esti miércoles que'l Gobiernu socialista d'Asturies vete la Llei de midíes urxentes pa garantizar la función social de la vivienda, que propón IU. "La mesma llei que convalidó n'Andalucía'l PSOE y IU, y que nin siquier el Partíu Popular atrevióse a votar en contra, sinón que s'astuvo, dau'l so conteníu social", apunta.

Asina lo reveló Orviz, nuna rueda prensa na que sorrayó qu'esta decisión del executivu autonómicu produzse mientres sigue habiendo "xente sin cases y cases sin xente", y cada vez más paraos que pierden la so vivienda por nun poder face-y frente.

"IU d'Asturies, como'l PSOE y IU n'Andalucía pretende dar seguridá a los espoliaos, a los nuevos probes que cuerren riesgu de perder la so casa", esplica'l coordinador asturianu. "Ente los deshaucios y les families, escoyemos les families, ente los bancos y les persones, estes últimes, y ente la protección o l'abandonu esiximos el derechu a vivir dignamente", sorraya.

Pela so parte, el voceru parlamentariu d'IU na Xunta Xeneral, Ángel González, sorrayó qu'ésti ye'l primer proyectu de llei que veta'l Gobiernu de Javier Fernández aludiendo motivos económicos. "Hasta agora l'executivu --señala González- pronunciárase a favor o en contra, o nun dixera nada, pero dexaba vía llibre a la tramitación parlamentaria".

El voceru d'IU alvirtió que Javier Fernández "tal paez que ta en rebeldía con polítiques d'izquierda que'l so propiu partíu defende n'España y especialmente n'Andalucía", cuando IU n'Asturies nun modificó "nin una coma de la llei andaluza". El voceru asturianu d'IU convidó al presidente del Principáu a "aplicar esta rebeldía a les polítiques de dereches del Gobiernu d'España".

UN NUEVU TESTU

El grupu parlamentariu d'IU rexistró esti miércoles un nuevu testu pa la Llei con un únicu cambiu, la fecha d'entrada en vixencia que pasa de ser al otru día de la so publicación al 1 de xineru del 2014, y asina nun afecte al presupuestu d'esti añu, desmontando asina l'argumentu del Gobiernu.

Esti cambiu supón a xuiciu de González "una oportunidá pa que'l Gobiernu rectifique", anque podría aplicase la primer redacción de la llei realizando un cambiu presupuestariu, y una reorganización de personal. El voceru d'IU tamién recordó que'l próximu presupuestu "va haber que negocialu".

"La Llei nun ye solo pa poner fin a unos deshaucios, sinón que tien fondu enforma, porque significaría tamién poner nel mercáu d'alquiler miles de les 80.000 viviendes qu'agora tán vacíes como certifica'l Gobiernu, y supondría una evidente meyora pa munches persones sin cases y pa otros munchos más pagando alquileres escesivos al respecto de los salarios", señala Ángel González.

Pela so parte, la diputada encargada de vivienda nel Parlamentu autonómicu, Marta Pulgar, sorrayó que l'informe realizáu pol Gobiernu pa vetar esta propuesta de Llei realizóse "a la carta" pa negar políticamente una iniciativa, y demuestra "que rescampla que nun hai interés pela so parte".

Ente los argumentos retrucaos por Pulgar figura que, n'Asturies, el departamentu de vivienda cuenta con una estructura alministrativa importante y capaz de desarrollar estes midíes, como ye'l casu de Vipasa; tamién que n'Andalucía la llei de función social de la vivienda aprobóse con posterioridá a los presupuestos y nun provocó nengún problema.

Sicasí, otra manera, añade, "equí'l Gobiernu socialista aprueba un conveniu colos bancos, pa tratar los deshaucios, que nun ye más qu'una copia del modelu de bones práctiques que punxo en marcha'l Gobiernu de Rajoy, acuerdu que nesti momentu nun conocemos que solucionara nengún desahuciu y del que dudamos de la so efectividá".