L'IPC sube un 0,5% n'Asturies n'Abril

UVIÉU/MADRID, 14 de Mayu (EUROPA PRESS)

L'Índiz de Precios de Consumu (IPC) elevóse n'Asturies n'abril en cinco décimes sobre'l mes anterior, una décima más que nel conxuntu del país, según datos publicaos esti martes pol Institutu Nacional d'Estadística (INE).

Esta subida de los precios n'Asturies n'abril dexa la tasa interañal del IPC nel 1,3%, perbaxo de la media del país (1,4%).

La subida de los precios n'abril n'Asturies debióse, sobremanera, a la subida de los del vistíu y el calzáu (12,1), siguíu bien de lloñe polos alimentos y bebíes non alcohóliques (0,4%).

Tamién subieron los precios de bebíes alcohóliques y tabacu (0,3%), menaxe (0,2%) y otros (0,1%). Baxaron pel contrario los precios de vivienda (-1,7%) pol abaratamientu de la eletricidá, medicina (-0,4%), tresporte (-0,7%) pola baxada de los carburantes y llubrificantes, comunicaciones (-2,5%) pola rebaxa de los servicios telefónicos, y ociu y cultura (-0,4%). Caltiénense los precios d'enseñanza y hoteles, cafés y restoranes.

No que se refier a la tasa interañal, rexistráronse subíes na medicina (11,1%), bebíes alcohóliques y tabacu (5,6%), enseñanza (3,7%), alimentos y bebíes non alcohóliques (2,8%), otros (2,8%), menaxe (1,7%), ociu y cultura (1,3%) vivienda (0,3%) y vistíu y calzáu (0,2%). Otra manera, baxaron en comunicaciones (4,1%), n'hoteles, restoranes y cafés (0,3%) y tresporte (0,2%).

DATOS NACIONALES

N'España, l'IPC subió n'abril un 0,4% al respecto de marzu, pero retayó un puntu la so tasa interañal, hasta'l 1,4%, gracies al abaratamientu de los carburantes y de la lluz.

La tasa interañal del 1,4% algamada n'abril ye la más baxa dende marzu del 2010, cuando la inflación asitióse tamién nel 1,4%. Dende l'entamu del presente exerciciu, la inflación interañal baxó 1,3 puntos, dende'l 2,7% al 1,4%.

Según esplicó l'INE, los grupos con mayor influencia na variación de la tasa interañal fueron la vivienda, que la so variación cayó casi cuatro puntos, hasta'l 0,5%, por cuenta de la baxada de los precios de la eletricidá, y el tresporte, que presentó una tasa del -0,7%, más d'un puntu inferior a la de marzu, pola baxada de los precios de los carburantes y llubricantes.

Pela so parte, el repique mensual d'abril, el terceru consecutivu al alza, debióse, sobremanera, al encarecimientu del vistíu y el calzáu pola temporada primavera-branu, y tamién a la subida de precios de los alimentos y bebíes non alcohóliques.

Concretamente, el grupu de vistíu y calzáu rexistró una tasa mensual del 10,1%, mientres que el d'alimentos y bebíes non alcohóliques subió un 0,3%.

En contraste, n'abril esperimentaron descensos mensuales de precios na vivienda (-1,5%) pol abaratamientu de la eletricidá, y en tresporte (-0,8%) poles baxaes de los precios de los carburantes y llubricantes. Los precios de les comunicaciones, pela so parte, cayeron un 2,5%, pola reducción de los servicios telefónicos.

Pel so llau, l'Índiz de Precios de Consumu Harmonizáu (IPCA) quedó n'abril nel 1,5%, más d'un puntu inferior al respecto de marzu, mientres la inflación subxacente, que nun inclúi los precios de los productos enerxéticos nin de los alimentos sin ellaborar, baxó cuatro décimes, hasta'l 1,9%.