Inaciu Galán y Sabel Tuñón.
EUROPA PRESS.
Actualizado: miércoles, 28 febrero 2018 18:15

Unes 150 persones yá tán inscrites nun seminariu onde van participar el rector Santiago Granda y un lletráu del Tribunal Constitucional

OVIEDO, 28 Feb. (EUROPA PRESS) -

Los cuatro partíos con representación parllamentaria que lleven nel so programa electoral la oficialidá --PSOE, Podemos Asturies, IX y Foru Asturies-- van participar esti sábadu 3 de marzu nuna mesa redonda sobre'l modelu d'oficialidá que se podría afacer al casu asturianu.

Va ser dientro del seminariu 'Oficialidá, el camín constitucional pal futuru del asturianu', que se va celebrar esti vienres y esti sábadu nel Edificiu Históricu de la Universidá d'Uviéu. L'actu va inauguralu'l rector Santiago García Granda y ta entamáu pola asociación Iniciativa pol Asturianu.

El presidente d'esta entidá, Inaciu Galán, presentó'l programa del mesmu esti miércoles n'Uviéu acompañáu de la vocal de voluntariáu Sabel Tuñón, onde destaca'l debate nel que van participar la responsable de normalización na executiva de la FSA, Mari Luz Pontón, y los diputaos Andrés Vilanova (Podemos) y Concha Masa (IX). Falta por confirmar la persona que va participar de Foru Asturies.

Nesi sentíu, Galán afirmó que nestos momentos ta pasándose de debatir sobre si oficialidá sí o non "pa empezar a falar sobre cómo tien que ser el modelu d'oficialidá". Asina, afirmó que, "anque tovía hai sectores políticos que nun se sumaron", la oficialidá ye una cuestión que xenera "consensu".

"Hai datos erroneos y queremos dar información a la ciudadanía sobre un marcu xurídicu que naz de la Constitución", indicó Galán, qu'añadió qu'hai "dalgunos partíos" que quieren meter al asturianu nun "debate negativu". Por eso, fixo apueste por "empezar a construir un modelu d'oficialidá" y esperó que'l PP se sume a esi debate "como fixo en Galicia, onde'l PP desarrolló la oficialidá".

El seminariu, onde yá hai confirmada l'asistencia d'unes 150 persones, "lo que demuestra que respondimos a una demanda de la sociedá sobre lo que va ser la oficialidá", indicó Galán, va inauguralu'l rector Santiago García Granda esti vienres 2 de marzu a les 16.30 hores.

La primera de les ponencies va dala'l presidente de l'Academia de la Llingua Asturiana, Xosé Antón González Riaño, que va falar sobre'l marcu xeneral d'aplicación de la oficialidá. Depués va estrenase'l documental 'La vida ensin oficialidá', onde se recueyen casos d'asturianos que tuvieron problemes pa desarrollar determinaes facetes de la so vida n'asturianu.

Más tarde, la profesora de la Universidá d'Uviéu, Isabel Hevia, va falar de les ventayes del billingüismu asturianu-castellanu nel sistema educativu. La xornada del viernes va acabar col lletráu del Tribunal Constitucional José Manuel Pérez Fernández, que va falar sobre el tratamientu que la Constitución española da a les otres llingües propies del Estáu.

Yá'l sábadu, el profesor de la Universidá del País Vascu y director del Euskobarometro, Francisco José Llera Ramo, va ufrir a les 10.00 hores datos del III Estudiu Sociolllingüísticu d'Asturies, "onde'l 53% de los asturianos diz que ta a favor de la oficialidá y namás un 18% ta en contra", recordó Galán.

Depués va facese una mesa redonda sobre la normalización nos conceyos y el profesor d'Economía Xosé Alba va falar sobre los empleos que xenera l'aplicación de la oficialidá, mentes que l'escritor Xuan Bello, el nome más destacáu de les lletres asturianes, va falar de la oficialidá y el desarrollu cultural d'Asturies.

A les 13.00 hores, la mesa redonda colos partíos parllamentarios que lleven la oficialidá nel so programa va poner puntu final a esta xornada onde "persones espertes van poder esplicar otros modelos y situaciones que puen encaxar nel casu asturianu", esplicó Galán, que recordó qu'esti idioma "nun ye diferente a otres llingües d'Europa".

Asturianu ofrecido por