El Senáu defenderá la tramitación del impuestu sobre depósitos bancarios

MADRID, 14 de Mayu (EUROPA PRESS)

La Mesa del Senáu acordó que la cámara presente alegaciones nel Tribunal Constitucional pa defender la tramitación de la llei qu'establez un impuestu estatal sobre los depósitos bancarios ante los recursos de Cataluña y d'Asturies. L'acuerdu contó col votu a favor del PP y l'astención de PSOE y CiU.

L'acuerdu va suponer la comparecencia del Senáu n'ambos procedimientos pa presentar alegaciones, que van correr al cargu de los servicios xurídicos de la cámara.

La institución suel personase nestos casos pa defender cómo tramitó les lleis qu'aprueba, igual que'l Congresu. Nesta ocasión, tratóse de los recursos d'inconstitucionalidá contra l'artículu 19 de llei 16/2012 de consolidación de les finances públiques y del puxu a l'actividá económica.

Esi artículu establez un impuestu estatal sobre los depósitos bancarios, evitando la llexislación autonómica. Estremadura y Andalucía contaben con esta imposición dende'l 2001 y el 2010, respectivamente, y l'añu pasáu aprobaron normes asemeyaes, tanto Cataluña y Asturies, como Canaries.

La capacidá de les autonomíes p'aprobar esti impuestu recibió'l vistu bonu del Tribunal Constitucional, que resolvió a favor d'Estremadura un recursu del Estáu contra la so normativa del 2001. Por ello, el Gobiernu optó por aprobar una regulación pal conxuntu del país y evitar que les autonomíes tengan la iniciativa y los depósitos d'un mesmu bancu puean tar gravaos o non, o a tipos distintos, en según qué comunidá.

Sicasí, Asturies y Cataluña llevaron esta norma al altu tribunal, por entender ente otros motivos que l'impuestu estatal va en contra de la competencia autonómica y busca llendar l'autonomía financiera de los gobiernos rexonales. Los recursos tán almitíos a trámite y pendientes de resolución.