La Unión de Consumidores diz que la ufierta de vuelos d'Iberia a 33 euros ye "falsa dafechu"

UVIÉU, 21 de Payares (EUROPA PRESS)

El residente de la Unión de Consumidores d'Asturies (UCE), Dacio Alonso calificó de "falsa dafechu" la ufierta que promociona Iberia d'unir d'Asturies con Madrid por 33 euros ida y vuelta.

UCE-Asturies denuncia qu'Iberia incrementó un 150% el preciu de los sos billetes al tornar nel únicu operador qu'une Asturies con Madrid, según declaró Dacio Alonso, güei nuna rueda prensa.

"Mos preocupa que los consumidores seyan los que paguen les consecuencies de la crisis económica", señaló Dacio Alonso. Iberia vuelve tener el monopoliu n'Asturies na conexón aérea con Madrid y la UCE propón como competencia a esti monopoliu la utiilzación del tren. "La meyor forma de qu'Iberia abarate los sos precios ye la competencia, y cosideramos qu'el tren ye l'alternativa más barata", manifestó.

Sin embargu, la UCE exixe a Renfe un incrementu de los trenes Alvia con Madrid y de la mesma manera una meyora nes combinaciones horaries. Nesti momentu Alvia con destín Madrid parte d'Asturies a les 7.30 de la mañana. UCE pide a Renfe que'l primer tren seya aa les 6 de la mañana pa permitir tar en Madrid con tiempu.

La ufierta que promueve Iberia ye de 44 euros ida y vuelta pero exixendo una estancia mínima de tres díes o la nueche del sábadu nel destín. UCE conidera qu'Iberia vuelve a la so teoría de les ufiertes ganchu y qu'en realidá la conexón Asturies-Madrid ye de más de 250 euros ida y vuelta.

La condición de monopoliu d'Iberia fai qu'Asturies tenga la conexón aérea más cara d'España, según declaró Dacio Alonso y animó al Gobiernu rexonal a que tome midíes y garantice competencia pa Iberia. "L'alministración debe garantizar que los contautos con otros operadores tengan estabilidá nel tiempu", declaró.

"Ye un problema d'Asturies nel que tien qu'implicase'l Gobiernu rexonal, les Cámares de Comerciu, la Federación Asturiana d'Empresarios y los empresarios en xeneral", destacó Dacio Alonso.