Xunta Pola entama un cursu de traducción audivisual

UVIÉU, 2 de Marzu (EUROPA PRESS)

La Xunta Pola Defensa de la Llingua Asturiana informó esti xueves nuna nota de prensa que les places pal cursu-taller de traducción audiovisual (17 y 18 de marzu del 2017) tán a puntu d'escosase.

Esti cursu-taller naz col oxetivu de dar a conocer a la xente en xeneral y a los interesaos nel mundu audiovisual en particular, les posibilidaes qu'estes técniques aporten a la producción audiovisual asturiana. Pa esti llabor, vamos contar con ún de los espertos más reconocíos na materia, Xoán Montero.

Xoán Montero Domínguez ye doctor en Traducción y Interpretación pola Universidade de Vigo, onde desenvuelve'l so llabor docente y investigador. Amás d'autor de diversos trabayos científicos nos ámbitos de la traducción audiovisual y de la normalización llingüística, ye tamién editor de los volumes "Traducción para a dobraxe en Galicia, País Vasco e Cataluña. Esperiencias investigadores e profesionais" (Universidade de Vigo, 2010), "Traducción para la comunicación internacional" (Comares, 2013) y "Traducción y industrias culturales. Nuevas perspectivas de analisis" (Peter Lang, 2014).

Toles persones interesaes puen apuntase mandando un mail a info@exunta.org o bien llamando al 649297562. El 3 de marzu acaba'l plazu d'inscripción que va ser per orde estrictu de matriculación.