Alvierten de que'l Principáu quier dexar fuera de les plantiyes orgániques a los docentes d'asturianu

UVIÉU, 11 de Febreru (EUROPA PRESS)

La coalición Unidá Nacionalista Asturiana (UNA) denunció güei la situación na que s'alcuentren los maestros y profesores de llingua asturiana, de los que diz que tán nun "limbu xurídicu", porque el Principáu "niégase" a incluyilos nes sos plantiyes orgániques. Considera que la única solución ye la creación de la especialidá, cola correspondiente convocatoria de places n'oposiciones.

Al traviés d'una nota prensa, UNA denuncia que "dempués de la sentencia del Tribunal Supremu que declaraba illegal la existencia de dos tipos de plantiyes de profesoráu, l'Alministración del Principáu, en llugar d'igualar a los maestros y profesores de llingua asturiana col restu de los docentes, asitia a cientos de trabayadores nun 'limbu' xurídicu que fai peligrar los sos puestos de trabayu".

"Hasta esti momentu", continúa'l testu, "los enseñantes de llingua asturiana y fala eonaviega tuvieron desarrollando'l so trabayu dientro de la nomada 'plantiya funcional', lo que yá-yos torgaba la imposibilidá d'accesu al funcionariáu titular, viéndose empobinaos a una situación d'interinidá forzosa". Pa UNA, "esta situación amosaba yá'l desinterés del Principáu pola calidá de la enseñanza de l'asignatura, que pasaba pela falta de continuidá y los continuos desplazamientos de los docentes, asina como la imposibilidá d'acceder a les places de concursu-oposición, como'l restu de los compañeres y compañeros".

"La conseyería d'Educación, amparándose el problemes llegales, refuga agora la inclusión de los docentes nes plantiyes orgániques y la creación de la especialidá correspondiente, colo que na práctica, nestos momentos, los profesores y maestros de llingua asturiana y fala eonaviega nun esisten dende un puntu de vista llegal", señalá la organización.

UNA entiende que la única solución "pasa pela creación de les especialidaes de llingua asturiana y eonaviego nes mesmes condiciones que'l restu, ye dicir, dientro de la única plantiya qu'hai, la convocatoria d'una accesu equiparable al restu de les especialidaes y al empar xustu col colectivu d'enseñantes que trabayen pola dignificación de l'asignatura". Por too ello, UNA fai un llamáu a "sofitar les movilizaciones que los sindicatos d'enseñanza tienen anunciao".