Aparece estropiáu con ácidu'l coche del conceyal de Personal de Mieres

MIERES/UVIÉU, 15 de Mayu (EUROPA PRESS)

El vehículu del conceyal de Personal, Seguridá Ciudadana y Mediu Rural de Mieres, Juan José Menéndez, apaeció esti martes estropiáu, tres rocialu con ácidu. Esti actu vandálico coincide con un tensu discutiniu ente'l Conceyu y la plantiya municipal ante los recortes anunciaos nel plan de viabilidá del decretu de pagu a proveedores.

Dende l'equipu de Gobiernu (IU), mostraron la so "solidaridá" col conceyal y llamentaron esti tipu d'actos, dao que "constitúin un ataque intolerable contra una persona que salió escoyida democráticamente pola ciudadanía nes pasaes elecciones municipales". El refugu a esti sucesu apoyólu'l restu de la corporación municipal.

El conceyal presentó la correspondiente denuncia, dao que'l vehículu sufrió daños en bona parte de la so carrocería. El socesu prodúxose na madrugada previa a que'l Conceyu celebrara una sesión plenaria estraordinaria pa sacar alantre l'endeudamientu de siete millones d'euros que-y permitirá xuntase al decretu de pagu a proveedores del Gobiernu central.

Dempués de la sesión plenaria, la plantiya municipal tenía prevista una protesta polos recortes a les puertes del Conceyu que xeneró un nuevu discutiniu. CCOO y UXT pidieron la disolución de la manifestación, pero'l restu de sindicatos decidieron siguir alantre porque, de lo contrario, podría paecer que se achaca l'autoría de los actos vandálicos a un trabayador. L'equipu de Gobiernu d'IU espera que "los fechos s'esclaren y s'alcuentre al responsable d'estos intolerables actos".