Barroso diz que les elecciones mostrarán la determinación de Grecia de siguir nel euru

Reuters

BRUXELES, 16 de Mayu (EUROPA PRESS)

El presidente de la Comisión Europea, José Manuel Durao Barroso, avisó esti miércoles a Grecia de que les nueves elecciones del 17 de xunu van ser "históriques pal futuru del país" porque nelles tien que mostrar el determín de quedar na eurozona". Barroso refugó relaxar el plan d'axustes esixíu a Atenes, pero mostróse abiertu a nueves iniciatives pa promover el crecimientu nel país.

"Correspuende a los ciudadanos griegos tomar una decisión informada dafechu sobre les alternatives, teniendo en cuenta qu'estes elecciones van ser históriques pal futuru del país", dixo Barroso en rueda prensa.

"Queremos que Grecia siga siendo una parte de la nuesa familia, de la UE y del euru. La Comisión Europea trabayó incansablemente pa llogralo y va siguir faciéndolo. Pero'l determín de quedar na eurozona tien que venir de la mesma Grecia", resaltó'l presidente del Executivu comunitariu.

"Vamos Respetar la decisión democrática de los griegos. Coles mesmes, los griegos han ser conscientes de qu'hai otres 16 democracies na eurozona y que les decisiones democrátiques tomaes pola eurozona tamién tienen que tenese en cuenta", indicó.

Barroso considera que relaxar el plan d'axuste que s'esixe a Atenes a cambiu del rescate de 130.000 millones d'euros minaría la credibilidá tanto de la mesma Grecia como del conxuntu de la eurozona. "Nun hai manera de cambiar los compromisos asumíos por Grecia y tamién polos 16 Estaos miembros de la eurozona".

Pero mostróse dispuestu a aprobar nueves midíes de puxu al crecimientu nel país helenu, que faciliten l'aplicación de los recortes.

El presidente de la Comisión aseguró ser consciente de "los sacrificios" que s'esixe a los griegos, pero defendió que'l plan d'axuste "ye la menos difícil de toles alternatives difíciles". "Ofrez solidaridá a cambiu de reformes, apoyu a cambiu de reformes, financiación que nun existiría en nenguna otra circunstancia", destacó.