El cambiu de baremu pa oposiciones de primaria elimina la valoración del Cursu d'Espertu n'asturianu, según sindicatos

UVIÉU, 28 d'Abril (EUROPA PRESS)

El cambiu de baremos prauticáu pola Conseyería d'Alministraciones Públiques na convocatoria d'oposiciones pa maestros de primaria elimina la valoración del Cursu d'Espertu en Llingua Asturiana, ufiertáu pola Universidá d'Uviéu como cursu propiu pa los diplomaos en Maxisteriu que quieran ser docentes d'asturianu.

Asina lo esplicaron güei los representantes sindicales Beatriz Quirós (Suatea), Gumersindo Rodríguez (ANPE), José Ángel Piquero (CC.OO) y Gerardo Domenech (CSI-CSIF), nuna rueda prensa ofrecida esti mediudía n'Uviéu, pa cifrar el siguimientu de la fuelga d'enseñanza convocada pa güei, que les cuatro organizaciones establecieron nun 61%, sin contar los servicios mínimos.

Según esplicó Gerardo Domenech, el Cursu d'Espertu en Llingua Asturiana hasta agora completaba l'apartáu trés de la baremación, qu'inclúi cursos, seminarios y xornaes homologaes, cursos d'otres especialidaes y cursos non homologaos. "Esti cursu agora pasa a puntuar cero", aseguró. El títulu d'Espertu conlleva un añu llectivu de clases que sumen 56 creitos (asemeyáu a un cursu universitariu), y sólo lo puen facer diplomaos en maxisteriu.

Pa Gumersindo Rodríguez, ta "engañándose" a los que preparen oposiciones y a los interinos, que lleven munchos años faciendo cursos pa elevar la so puntuación. Según Piquero, "a munchos d'ellos nun-yos va compensar presentase porque con esti cambiu de baremu, puen perder puntos con respeuto a l'anterior convocatoria".

Pa los sindicatos, esti cambiu de baremación pue conllevar qu'unos 600 maestros interinos de primaria puen perder el so emplegu nos próximos dos años n'Asturies, si la interinidad se reduz del actual 17% al 4,5%, como adelantó hai poco tiempu la vocera del Gobierno y conseyera d'Alministraciones Públiques, Ana Rosa Migoya.

"ÉXITU" DE LA FUELGA

Los sindicatos consideraron un éxitu la cifra del siguimientu de la fuelga, que "nun cuenta'l persona que foi a trabayar obligáu pola Alministración", ye dicir, los servicios mínimos, que calificó d'abusivos. Asina, la Conseyería estableció qu'ún de cada trés docentes de primaria y ún de cada cuatro de secundaria diben tener que cumplir col so trabayu, amás del 100% de la plantiya de centros de educación especial, colexos rurales agrupaos y escueles-residencia.

Esplicó tamién qu'ayeri mesmu los docentes recibieron una carta de la Conseyería d'Educación na que s'informaba de los descuentos salariales que diben aplicase a los que secundaron l'anterior paru. "Qué casualidá que la manden el día enantes de la fuelga", ironizó Quirós.

Trátase del segundu paru nel mes d'abril (l'anterior foi'l día 1) pa exixir la retirada del actual plan d'evaluación docente y la convocatoria de la mesa sectorial d'educación per parte de la Función Pública del Principáu.