Cascos: "el PP fizo lo imposible pa impidir el pactu con Foru"

UVIÉU, 17 de Mayu (EUROPA PRESS)

El presidente d'Asturies en funciones, Francisco Álvarez-Cascos, dixo esti xueves que'l PP "fizo lo imposible pa torgar el pactu con Foru" mientres esti tiempu, a pesar de que vino diciendo lo contrario.

Nuna entrevista concedida a esRadio recoyida por Europa Press, Cascos dixo que nes negociaciones pa la gobernabilidá n'Asturies, los 'populares' nun quisieron nunca'l pactu y cuando se llogró por fin acordar un programa de Gobiernu plantegaron la "torga" de que la candidata tenía que ser Mercedes Fernández, lo que torgó la continuidá de les negociaciones con UPyD.

Depués, señaló, el PP cambió de criteriu, pero punxo a Foru la condición de que pa que los apoyara tenía que llobrar el preste d'UPyD. Y a lo último, refirióse a l'amenaza esti sábadu d'intervención d'Asturies per parte del ministru de Facienda, Cristóbal Montoro.

Según Cascos, en realidá, dende'l PP "queríen rompese tolos pontes". En referencia al enfrentamientu que tuvieron esti miércoles nel Congresu Mariano Rajoy y Rosa Díez, Álvarez-Cascos declaró que "la confrontación d'ayeri de Rajoy utilizando un tonu atentu con Rubalcaba mientres usaba otru bien duru contra Rosa Díez yera'l reflexu de lo qu'escondía'l PP: facer saltar tolos pontes ente Foru y UPyD". Caltién Cascos que "hai un deséu común del PSOE y PP de liquidar a Foru".

Amás, Cascos mostró les sos dudes sobre la trescendencia y la estabilidá del futuru gobiernu d'Asturies, "tres el pactu d'UPyD col PSOE pa gobernar n'Asturies, argumentando que namás se conoz l'acuerdu pa la investidura".

Aseguró nun conocer cómo s'incluyó a UPyD nel pactu previu de PSOE-IU. Na so opinión, la formación de Rosa Díez "firmó un acuerdu col PSOE, pero nun sabemos si con IU", polo que pel momentu'l pactu ye colos 17 diputaos socialistes y non colos 22 que sumen éstos con IU.