Cascos reconozse ablucáu ante la salida de Rato de Bankia

UVIÉU, 16 de Mayu (EUROPA PRESS)

El presidente en funciones del Principáu d'Asturies, Francisco Álvarez-Cascos, manifestó esti miércoles tar "ablucáu" ante la salida de Rodrigo Rato de Bankia. "Va dos años Mariano Rajoy llamólu pa qu'asumiera Caja Madrid y agora'l PP píde-y qu'abandone'l cargu por ser miembru del partíu", manifestó.

Nuna entrevista concedida a Catalunya Radio y recoyida por Europa Press, Cascos diz que nun acepta que la política seya una "lacra" o un "estigma" pa caltener el prestixu profesional. "Y Rodrigo Rato ye la persona con más prestixu nel ámbitu de la política española, y esi prestíu caltiénse inalterable", dixo.

Señaló que lo que Rato nun pudiera facer estos dos años al mandu de la entidá bancaria pa resolver la situación que se produxera nun ye razón pa desmerecer esi prestixu. Insitió en que considera "inxusto" que la so condición de miembru del PP tornare nuna xustificación pa una decisión que resulta "incomprensible".

Preguntáu sobre si esi prestixu podía siguir calteniéndolo Rato cuando hai dos selmanes dicía que Bankia tenía beneficios, Cascos respondió que Rato taba "nel so papel", como tolos que tán al mandu de les instituciones financieres y quieren ganar la confianza de los mercaos.

Según Cascos, el nivel de confianza na economía española ye fundamental y por eso nun ye partidariu de llanzar mensaxes que xeneren rocea. "El tratamientu sicolóxicu de los enfermos ye fundamental; de vez en cuando les midíes coyunturales nun ye conveniente esplicales porque n'ocasiones les verdaes nun puen esplicase, cuando nun puen entendese responsablemente", apuntó Cascos, comprensivu colos esfuerzos dirixíos a caltener "primero de too" la confianza nesta situación difícil de la economía española y les entidaes financieres.