La CE diz que nun ye posible inyectar a la banca dineru del fondu de rescate

BRUXELES, 21 de Mayu (EUROPA PRESS)

La Comisión Europea dixo esti llunes que nun ye posible dende un puntu de vista xurídicu inyectar dineru del fondu de rescate de 500.000 millones d'euros de la UE directamente a los bancos, y que cualquier ayuda tien que pasar pelos Estaos y acarreta un plan d'axuste.

L'Executivu comunitariu salió asina al pasu de delles informaciones apaecíes na prensa según les que los líderes europeos van debatir nel conceyu que se celebra esti miércoles la posibilidá d'usar el fondu de rescate pa recapitalizar bancos con problemes, pensando sobremanera n'España. Alemaña vetó siempre esta opción, que yá se contempló l'añu pasáu.

"Nun ye posible inyectar dineru del fondu de rescate européu directamente a los bancos. Cualquier ayuda tien que pasar pelos Estaos y conlleva un programa d'axuste", dixo'l voceru d'Asuntos Económicos. Asina ta previsto, recordó, nel Tratáu que crea'l fondu de rescate, que tán ratificando los Estaos miembros.

El voceru dixo que nun-y consta qu'haya negociaciones pa modificar esti Tratáu. L'Executivu comunitariu tampoco quiso pronunciase sobre la posibilidá de que se cree un sistema européu de garantía de depósitos bancarios col fin d'evitar una fuga de depósitos nos países más vulnerables.

En contraste, la Comisión sí apoyó la propuesta del nuevu presidente francés, François Hollande, de que nel conceyu se debata sobre la posibilidá d'introducir eurobonos. "Ye claramente una parte de la nuesa respuesta a la crisis la posibilidá de tener una ferramienta d'emisión común de deuda", dixo'l voceru.

La creación de eurobonos "sería un activu importante pa la respuesta a la crisis" y "tien sen dende'l puntu de vista económicu", anque se trata d'una "decisión política" que requeríe avanzar escontra la unión fiscal", esplicó'l voceru.