El coste mediu d'una boda n'Asturies ta en 11.000 euros, el tercer más baxu del país

MONTEROSA

UVIÉU/VALLADOLID/MADRID, 21 de Mayu (EUROPA PRESS)

El costu mediu de celebrar una boda n'Asturies ye de 11.000 euros, lo que representa'l tercer importe más baxu del país, según un estudiu ellaboráu pola Federación d'Usuarios y Consumidores Independientes (FUCI).

Asina, la rexón ta per detrás de Canaries onde'l costu mediu de celebrara una boda ye de 10.500 euros y Estremadura (10.600 euros). Pela contra, Madrid ponse a la cabeza con un gastu mediu de 16.600 euros, siguida de Cataluña (15.900 euros) y Valencia (15.500 euros). Tamién superen a Asturies Castiella-La Mancha (11.430 euros, Aragón (11.700 euros) y Castiella y Lleón (12.100).

Según reflexa l'estudiu, en total, el costu mediu de celebrar una boda n'España queda en 13.190 euros, lo que representa un descensu del 8,3 por cientu sobre'l 2011.

Pal presidente de FUCI, Gustavo Samayoa, el fechu de que'l gastu en bodes n'España baxe per quintu añu siguíu ye "consecuencia directa del negativu contestu económicu que ta llastrando la economía de los españoles". Nesti sen, destacó que dende qu'entamó la crisis, el gastu previstu polos novios baxó un 42 por cientu, siendo la xinta, el viaxe y dellos detalles nupciales los capítulos onde se producen los mayores recortes.

El banquete representa'l principal gastu d'una boda, al suponer la metá de la factura total. En función del restorán y menú escoyíu, el costu por convidáu pue variar ente los 36 y los 85 euros. A esti gastu hai qu'añadir la música y la barra llibre, que suponen unos 850 euros de media.

No referente a los traxes, los de les moces suponen un mayor desembolsu non inferior a los 500, cantidá a la qu'hai que sumar el preciu de los zapatos, complementos, maquillaxe, peináu y ramu qu'eleven "descomanadamente" el presupuestu hasta llegar a los casi 1.500 euros de media. Nos homes, el gastu ta ente 310 y 750 euros.

Los detalles nupciales, esto ye, les arres, aliances, invitaciones, les flores de la ilesia suponen sobre 1200 euros. Mientres, el costu mediu del reportaxe fotográficu y/o de videu, ta alredor de los 650 euros. Mientres, d'acuerdu al informe, el viaxe nun baxa de 1.200 euros por pareya, anque con grandes variaciones según el destín escoyíu.

FUCI encamienta a les pareyes que deciden casase facer un presupuestu acordies coles posibilidaes; comparar precios y calidaes; dexar zarráu'l preciu final del cubiertu, que suel incluyir la decoración, y realizar una prueba del menú; concretar los detalles de la barra llibre, marques y tipos de bebíes, horariu y forma de pagu, y acutar anticipadamente'l viaxe.

A lo último, recuerda la importancia de guardar los xustificantes de compra pa poder reclamar y anima a pidir les fueyes de reclamaciones en casu de ver incumplíos los derechos.