Cristina Coto cree que n'Asturies "empezó a perdese'l tiempu"

UVIÉU, 22 de Mayu (EUROPA PRESS)

La vocera de Foru na Xunta Xeneral d'Asturies, Cristina Coto, llamentó esti martes la "falta de conteníu" del discursu d'investidura del candidatu del PSOE a la Presidencia del Gobiernu, Javier Fernández. "Llamentablemente n'Asturies güei empezó a perdese'l tiempu", apuntó.

Nuna rueda prensa tres la sesión plenaria, Coto fizo referencia a la "brevedá" del discursu de Javier Fernández, d'una hora de duración. Y apuntó diciendo que mientres l'anterior presidente socialista, Vicente Álvarez Areces facía discursos "somníferos", el candidatu actual "pasóse al otru estremu".

A xuiciu de Coto, la intervención de Fernández limitóse a enunciar grandes oxetivos. "Nun ye un discursu d'investidura, ye una especie de discursu d'ingresu a una academia de ciencies morales y polítiques", señaló.

Esi discursu "vacu", según la vocera de Foru, debióse a que Javier Fernández "nun supo facer otru", o a que tien "demasiaos condicionantes", en referencia a los sos acuerdos con otres fuerces como IU.

Según Foru, Javier Fernández presentó esti martes una Asturies "a vista d'astronauta", cuando los asturianos merécense que los políticos "baxen a la tierra" y faigan un estudiu "detalláu" de los problemes qu'afecten a la rexón.

Preguntada sobre les crítiques de Javier Fernández al Gobiernu de Cascos, Coto consideróles "improcedentes" nun discursu d'investidura, nel que "les soflames partidistes sobren".