El director de la Ikastola Hegoalde plantega un programa integráu d'asturianu, inglés y español nel currículu escolar

Afirma que nel País Vascu y Navarra los alumnos que más competencies tienen en castellanu son los de los modelos plurilingües

UVIÉU, 19 de Marzu (EUROPA PRESS)

El director de la Ikastola Hegoalde de Pamplona, Aitor Etxarte, ponente nes xornaes 'Llingua y Educación' que güei y mañana celébrense en Xixón entamaes pol sindicatu Suatea, apostó güei por un "programa integráu" d'asturianu, castellanu y inglés sometíu a una planificación conxunta nel currículum escolar de los centros asturianos. Punxo como exemplu'l País Vascu y Navarra, onde, según la so versión, los alumnos qu'estudien estos modelos plurilingües son los que meyores competencies educatives tienen, hasta en llingua española.

Etxarte ofreció güei una conferencia sobre esti tema nel marcu de les xornaes, que se celebren nel Centru Cultural El Llanu.

Etxarte apoya'l modelu de "un programa integráu de llingües". "Allá hai trés llingües curriculares, eusquera, español y inglés, y nos últimos 30 años tuvieron desarrollu didáctivos bien distintos", afirmó. "Nestos momentos", añadió, "ye cada vez más l'enclín qu'esiste per parte de colectivos docentes y na lliteratura profesional a entender que tol trabayu que tien que ver coles competencies comunicatives tien que ser frutu d'una planificación profesional rigorosa". Nesti sen reconoció que "la esperiencia dizmos qu'en cada colexu entámase'l currículu de les llingües de forma independiente, non condicionada, non vinculada, y eso ye un auténticu despropósitu dende'l puntu devista de la comunicación llingüística", señaló, matizando que ye un problema xeneral, y non yá del País Vascu y Navarra.

"Ye una realidá que se plantegó nos llugares onde la educación plurilingüe foi importante, como en Quebec, Bélxica o norte d'Europa, y na comunidá falante vasca hai una gran esperiencia, hai propuestes bien avanzaes reconocíes a nivel internacional", añadió. Según Etxarte, "si equí hai trés llingües con presencia escolar, l'asturianu, l'español, l'inglés, tienen que plantegase d'una manera conxunta en tol desarrollu del currículu escolar".

El proyectu que desarrollaron na Ikastola Hegoalde, según Exarte, consiste en que "toles situaciones con procesos comunicativos nel ámbitu escolar redúcense a un perfil de testu reconocible y qu'esos testos plániense de manera asemeyada en caúna de les trés llingües".

MEYOR NOS PROGRAMES PLURILINGÜES

Según Etxarte, "la esperiencia internacional rescampla, y en toles evaluaciones Pissa. En tolos programes nos qu'hai esperiencies plurilingües los resultaos escolares tienden a ser meyores qu'onde nun lo son". "En toles evaluaciones diagnóstiques que nesti momentu d'una manera obligatoria se faen en toa España, les posiciones tán contrastaes y demuestren que en Navarra y País Vascu los meyores resultaos danlos los alumnos que tán en modelu d'inmersión llingüística, osea que l'asuntu ta mui claru", añadió.

El director esplicó que "tamién asocede nos controles de competencia en llingua española". "Falen y escriben meyor en llingua española que los que namás estudien en llingua española", acabó.