Duro Felguera va reducir personal y instalaciones nos sos talleres d'Asturies

UVIÉU, 17 de Mayu (EUROPA PRESS)

L'actual panorama económicu va traducise n'Asturies na reducción de personal y instalaciones de los talleres de Duro Felguera n'Asturies, según confirmó, a preguntes de los periodistes, el presidente del grupu Ángel Antonio del Valle Suárez, qu'ofreció una rueda prensa n'Uviéu tres la xunta xeneral d'accionistes.

"Vamos tener que dir rebaxando amodo la capacidá productiva de los talleres", señaló l'empresariu, que diz que l'oxetivu ye quedar coles instalaciones "con futuru" y dir soltando'l "llastre".

Del Valle Suárez considera que les instalaciones que puen ser competitives son les de compañíes relacionaes coles víes y túneles, asina como calderería pesada nuna parte de la so actividá. "Hai otres actividaes que, por muncho que queramos nun llegamos; tamos fuera d'un mercáu que se globalizó pa tol mundu", indicó.

Puesto qu'ún de los oxetivos de Duro Felguera ye una mayor internacionalización, Del Valle Suárez solicita a los políticos que faciliten esti aspectu pa que les empreses puean ser competitives. Y punxo un exemplu Asturies. Dixo que-yos perxudicó la conexón aérea qu'había ente l'Aeropuertu d'Asturies y París.

De primeres, nel so discursu ante los accionistes, el presidente de Duro Felguera destacó'l compromisu de la compañía con Asturies, al apoyar delles iniciatives sociales, culturales y deportives, asina como otres d'ámbitu nacional y internacional.