La ex decana de Filoloxía cree qu'un mínor d'asturianu conlleva una formación "insuficiente" pal profesoráu de llingua

UVIÉU, 03 de Payares (EUROPA PRESS)

La ex decana de la Facultá de Filoloxía de la Universidá d'Uviéu y presidenta de l'Academia de la Llingua Asturiana, Ana Cano, entiende que la creación d'un 'mínor' d'asturianu propuestu pol actual decanu, José Antonio Martínez, pa integralu dientro del futuru Títulu de Grau de Filoloxía (actual carrera de filoloxía) ye "insuficiente" pa la formación del profesoráu de llingua asturiana que se pretende preparar. La profesora universitaria basáse na so carga llectiva, inferior a la del actual títulu propiu ufiertáu pol centru, y que s'exixe pa dar clase d'asturianu na enseñanza secundaria nesti momentu.

Asina s'espresó la presidenta de l'Academia en declaraciones a Europa Press. Cano presentó la so dimisión como decana'l pasáu mes de xunu, dempués de que la Xunta de la Facultá aprobare una enmienda del profesor Félix de Castro que proponía quitar la llingua asturiana de la propuesta de títulu de grau presentada pol decanatu. Na mesma incluyíase la posibilidá d'estudiar l'asturianu nun 'maior' de 72 creitos, o nun 'mínor' de 48. Agora'l decanu entrante plantega la creación sólo d'un 'mínor' como solución al conflictu.

"Yo creo qu'un mínor de 48 creitos nuna titulación de 240 en total, ye una carga llectiva insuficiente pa la formación del profesoráu de llingua asturiana", afirmó Cano. La ex decana recordó que l'actual títulu propiu d'especialista, que tienen de cursar los filólogos llicenciaos que quieren optar a dar clase d'asturianu nos institutos, "y que nestos momentos forma a estos profesores, tien 60 creitos, que ye un cursu académicu normal".

"Les nueves titulaciones van tener 60 creitos por cursu académicu", esplica, p'añadir que "el mínor, poro, va ser menos d'un cursu académicu, ye dicir, menos de lo que nestos momentos ye un títulu propiu, ye insuficiente".