Fernández acusa a Montoro de subordinar los intereses d'Asturies a los sos "demonios interiores"

UVIÉU, 22 de Mayu (EUROPA PRESS)

El candidatu del PSOE a presidir Asturies, Javier Fernández, cargó esti martes contra'l ministru de Facienda, Cristóbal Montoro, por amenazar con intervenir Asturies. Asina, dixo qu'esi tipu d'actuaciones ye exemplu de "cómo les gasta" la derecha, que "subordina l'interés de la comunidá y l'obligáu respetu institucional a los sos demonios interiores". Eso, según Javier Fernández, ye "inaceptable".

Na sesión plenaria d'elección del presidente, Fernández pronuncióse nestos términos de primeres del so discursu, nel que fizo repasu de lo asocedío n'Asturies mientres los últimos meses gobernaos por Francisco Álvarez-Cascos (Foru).

Fernández propunxo a los 45 diputaos de la Cámara un pactu que requier trés condiciones: "convencimientu democráticu, humildá y sen común". Trátase d'algo que considera necesario pa pasar la páxina de la estravagancia, del desgobiernu, y de la soberbia", en referencia al Gobiernu de Cascos.

El candidatu socialista, l'únicu que se presentó pa ser presidente, afirma que'l PSOE ye la única fuerza política capacitada pa liderar un Executivu que faiga frente a l'actual situación. "L'auténticu desafíu ye nun defraudar a los asturianos", dixo.

Comprometióse a facer tolo posible pa llograr "la recuperación y oxixenación democrática" de toles instituciones asturianes. "Los socialistes nun somos los responsables del sainete triste del últimu añu", dixo.

El plenu d'elección del presidente entamó con un minutu de silenciu en memoria del recientemente fináu Sergio Marqués, que foi presidente d'Asturies ente los años 1995 y 1999.