Fito & Fitipaldis tarán n'Uviéu'l 22 de setiembre

EUROPA PRESS

MADRID/UVIÉU, 16 de Mayu (EUROPA PRESS)

Casi dos años dempués, Fito & Fitipaldis vuelven a la carretera. Pero nesta ocasión van facelo nun formatu inhabitual dafechu nes sos dos últimes xires (que sumaron a más de millón y mediu de persones). Van entamar el 22 de setiembre n'Uviéu una xira que los va llevar a 14 capitales.

Amás d'Uviéu, el tour va pasar por Les Palmes de Gran Canaria, Santa Cruz de Tenerife, Donostia, Vigo, Sevilla, Valladolid, Granada, Murcia, Zaragoza, Bilbao, Madrid, Barcelona y Valencia.

Esta xira llevaba rondando la cabeza de Fito Cabrales dende dellos años. Con ella llograráse una cercanía y intimidá col so públicu que l'artista bilbaín añoraba. Fito volverá tar acompañáu de los sos yá habituales Fitipaldis, esto ye, Carlos Raya, Javier Alzola, Joserra Senperena, Daniel Griffin y Alejandro 'Boli' Climent.

Esti nuevu tour de los Fitipaldis va suponer una ocasión única d'escuchar los meyores cantares del repertoriu de la banda como nunca les escuchares. Va haber arreglos que mos darán una visión distinta de temes conocíos por toos sin qu'éstos pierdan la esencia 'Fitipaldi'.

Tamién va haber momentos eléctricos, momentos más 'unplugged' pero, sobremanera, va haber un espectáculu únicu y irrepetible diseñáu puramente pa estes actuaciones, dao qu'esta xira nun va pasar per más ciudaes que les 14 antes mentaes.

Les entraes van salir a la venta'l próximu 23 de mayu (nun siendo Donostia, que va salir el 30 de mayu). Tolos aforos van ser d'ente 1.300 y 3.000 persones, informa la promotora Last Tour International nun comunicáu.