Foru diz que l'amenaza d'intervención taba "premeditada"

UVIÉU, 15 de Mayu (EUROPA PRESS)

El voceru d'Economía y voceru axuntu de Foru, José Antonio Martínez, dixo esti martes que "l'amenaza" d'una posible intervención a Asturies per parte del Ministeriu de Facienda ye frutu d'una "decisión premeditada" del Gobiernu d'España. Martínez basóse en que la nota de prensa na que Facienda anuncia la posibilidá de tutelar les cuentes namás contempla criterios "políticos" y non económicos. Y nel fechu de que'l Plan Económicu Financieru enviólu'l Gobiernu asturianu'l vienres y el mesmu sábadu emitía'l Ministeriu de Facienda la nota prensa.

Martínez ofreció una rueda prensa, acompañáu de la vocera de Foru, Cristina Coto. "El Ministeriu, en nengún momentu comunicóse per vía oficial col Gobiernu d'Asturies, nin-y treslladó, non sólo un refugu del plan sinón la más mínima rocea, oxeción o pidimientu de documentación adicional; polo que la so respuesta, al traviés d'una nota de prensa ye un absolutu exerciciu de desllealtá institucional, que nun se produxo con nenguna otra comunidá autónoma, y que poro supón una discriminación inxustificada dafechu contra Asturies", llamentó.

El voceru axuntu quiso llanzar un mensaxe de "tranquilidá" a la sociedá asturiana porque les cuentes asturianes tán "saniaes" y el xueves nel Conseyu de Política Fiscal y Financiera el Principáu "va demostrar que cumple tolos parámetros marcaos pol Gobiernu, hasta non sólo cumplir col 1,5% de déficit esixíu, sinón que taríamos nos trés años ente'l 1 y el 0.99%"

José Antonio Martínez insistió en que'l ministru de Facienda, Cristobal Montoro, xeneró n'Asturies de forma "inxustificada" y "irresponsable" una alarma que pue tener consecuencies bien graves.

Dixo que'l Gobiernu de Foru basóse nuna xestión que nun toca aspectos como educación, sanidá y servicios sociales, pero que sí recorta na televisión autonómica y nos 'chiringos' creaos por gobiernos anteriores. Amás, llamentó los "sobrecostos" xeneraos por executivos socialistes nes obres del Puertu de Xixón, l'Huca o la "Y" de Bimenes, de más de 400 millones.

PROPUESTA D'UPYD

Preguntáu sobre'l refugu de la propuesta que realizó'l llunes Ignacio Prendes na Xunta de Voceros pa que'l parlamentu asturianu realizara un pronunciamientu común ante la gravedá del anunciu de Facienda, José Antonio Martínez dixo que'l so grupu "apoyaría" esi pronunciamientu conxuntu.

"Lo que pasa ye que dientro d'una Xunta de Voceros intentamos que seya too por consensu; y si la mayoría estima que nun se debe facer, toos estimtamos prácticamente lo mesmo", apuntó. Y insistió en que Foru nun s'opunxo a la propuesta del diputáu d'UPyD, Ignacio Prendes. "Tolo contrario", señaló.

REMISIÓN DEL PLAN

El Gobiernu d'Asturies, tal que se comprometió esti llunes, envió yá a los distintos grupos parlamentarios el Plan Económicu Financieru que mandara a Madrid.

Amás, al traviés d'una nota de prensa, l'Executivu señala qu'a fecha de 10 de mayu, cuando s'envió'l plan al Gobiernu central, los datos de la execución presupuestaria d'Asturies confirmen la continuación de la situación de superávit del primer trimestre. Esi día 10 de mayu'l superávit rexonal subía a 57,7 millones d'euros.

Recuerda l'Executivu que dende'l 1 de xineru del 2012, la prórroga presupuestaria derivada de la non aprobación pola Xunta del proyectu de Llei de Presupuestos Xenerales d'Asturies pal 2012 lo mesmo que de la non aprobación de la llei qu'habilitaría la financiación d'inversión pública esti añu determinen una reducción del gastu públicu n'inversión. Estos precedentes tienen una incidencia directa nel superávit.

El Gobiernu d'Asturies namás gasta n'atención de nómines de funcionarios, servicios esenciales pa la comunidá y demás atenciones "puramente imprescindibles". Y nun se pudo asumir parte de les añalidaes correspondientes al 2012 de les d'inversión autorizaos pol Gobiernu anterior y les nueves obres que contenía'l Proyectu de Llei de Presupuestos pal 2012, refugáu pola Xunta Xeneral d'Asturies, el pasáu 25 de xineru.