Fumar cannabis reduz algunos síntomes de la esclerosis múltiple

MADRID, 16 de Mayu (EUROPA PRESS)

Un estudiu clínicu realizáu en 30 pacientes adultos con esclerosis múltiple (EM), lleváu a cabu pola Universidá de California, en San Diego, demostró que'l cannabis fumáu pue ser un tratamientu efectivu pa la espasticidá -un síntoma frecuente y invalidante d'esta enfermedá neurolóxica-. L'ensayu, controláu con placetu, tamién dio llugar a una percepción reducida del dolor, anque los participantes tamién informaron, al breve plazu, d'efectos cognitivos adversos y aumentu de la fatiga. L'estudiu publicóse nel Canadian Medical Association Journal.

La investigadora principal, Jody Corey-Bloom, profesora de Neurociencia, y directora del Centru d'Esclerosis Múltiple de la Universidá de California, en San Diego, y los sos collaboradores, separó aleatoriamente a los participantes en dos grupos d'intervención; nún d'ellos, los integrantes fumaron cannabis una vez al día, mientres trés díes, y nel grupu control, fumaron pitos de placebu idénticos, tamién una vez al día, mientres trés díes. Dempués d'un intervalu d'once díes, los participantes cambiaron de grupu.

"Observamos que fumar cannabis superaba al placebu na reducción de los síntomes y el dolor, en pacientes con espasticidá resistente al tratamientu, o con contracciones escesives del músculu", afirma Corey-Bloom.

Informes anteriores yá plantegaren que los compuestos activos de la mariguana melecinal son potencialmente eficaces nel tratamientu d'enfermedaes neurolóxiques, pero la mayoría de los estudios centróse nos cannabinoides alministraos per vía oral.

Sicasí, esti estudiu utiliza una midida más oxetiva, la Escala Modificada d'Ashworth, que califica la intensidá del tonu muscular per mediu de la midida de, ente otres, la resistencia nel rangu de movimientu y rixidez.

El resultáu secundariu, el dolor, midióse utilizando una escala analóxica visual. Los investigadores tamién estudiaron el rindimientu físicu (con un paséu cronometráu) y la función cognitiva, y preguntaron a los pacientes pa evaluar la so sensación.

Anque xeneralmente foi bien toleráu, fumar cannabis tuvo efectos leves sobre l'atención y la concentración. Los investigadores anotaron qu'estudios más amplios, y al llargu plazu, son necesarios pa confirmar los sos descubrimientos, y determinar si dosis más baxes puen resultar n'efectos beneficiosos con menos impactu cognitivu.

L'estudiu actual ye la quinta prueba clínica sobre la posible eficacia del cannabis pa usu clínicu, observáu pol Centru d'Investigación del Cannabis Melecinal (CICM) de la Universidá de California. Otros cuatro estudios n'humanos, sobre'l control del dolor neuropáticu, tamién reportaron resultaos positivos.