UVIÉU, 08 d'Ochobre (EUROPA PRESS)
El sindicatu d'enseñanza Suatea confirmó güei que la inspeición educativa solucionó yá'l casu del alumnu del segundu de la ESO d'un institutu de Xixón al que s'escolarizare sin consulta previa na optativa de francés por falta d'alumnos matriculaos n'asturianu, la materia qu'él escoyere. Al paecer, había otros dos estudiantes na mesma situación, colo que decidió formase una clase de trés escolinos de Llingua Asturiana.
Asina lo esplicaron fontes del sindicatu, remitiéndose a la familia del alumnu en cuestión, que-y confirmó que la denuncia pública fecha la selmana pasada dio los sos frutos, dao qu'intervino la Inspeición educativa pa iguar la cuestión.
El sindicatu denunciare nuna nota prensa'l pasáu 1 d'ochobre que "dempués de recibir clase d'Asturianu en tola etapa Primaria y siguir en primeru la ESO, al mencionáu estudiante nel segundu cursu esviáronlu pa la optativa de Francés ensin tenela cursao en primeru, ensin tenela escoyío y, lo que ye más grave, ensin autorización de los pas".
La razón paecía ser que nun se llegaba a los ocho alumnos matriculaos necesarios pa formar un grupu d'optativa. Sin embargu, Suatea recordó que la resolución 16 de mayu de 2008 de la Conseyería d'Educación, pola que s'establez la ufierta y les condiciones pa la elección de materies optatives y materies opcionales pa la Educación Secundaria Obligatoria "prevé qu'escepcionalmente se formen grupos con menos alumnos".