IU d'Asturies, satisfecha por "pasar páxina" y zarrar un "periodu llamentable"

UVIÉU, 17 de Mayu (EUROPA PRESS)

El coordinador xeneral d'IU d'Asturies, Jesús Iglesias, mostróse esti miércoles "satisfechu" pol acuerdu qu'ayeri algamaron PSOE y UPyD que va garantizar qu'a lo último salga escoyíu como presidente d'Asturies el socialista Javier Fernández. La nueva situación, según dixo Iglesias, va permitir "pasar páxina" y zarrar un "periodu llamentable", en referencia a la etapa na que tuvo gobernando Francisco Álvarez-Cascos (Foru).

Nuna rueda prensa ufiertada n'Uviéu, Iglesias dixo que la etapa de Cascos caracterizóse por "conflictos", "confrontaciones", "inacción" y "descalificación institucional". Una situación de la que fizo responsable tamién al PP.

Sobre l'acuerdu qu'algamó PSOE y UPyD y que s'anunció esti miércoles, IU tien "coincidencies", "dudes" y "discrepancies". Sicasí, Iglesias dexó claro qu'IU acordó nel so momentu otru documentu col PSOE pol que s'agotaríen eses dudes y discrepancies.

Iglesias dexó claro que los cinco parlamentarios van apoyar a Javier Fernández na investidura. Y que d'equí p'alantre van siguir les conversaciones col PSOE. Porque n'IU tán abiertos a cualquier posibilidá, incluyida la entrada nel Gobiernu. Iglesias afirmó que la so formación siempre va garantizar la estabilidá "si defenden los servicios públicos frente a los recortes del Gobiernu de la nación, y si apostar pola industria".

Precisamente, una de les cuestiones coles qu'IU discrepa sobre l'acuerdu ente PSOE y UPyD ye la falta de reivindicación de la política industrial, que nun se defenda'l carbón o que nun se fale del sector enerxéticu o que se trate "superficialmente" la llucha contra'l desempléu. "Esi problema ye algo que nun se pue espachar con ayudes a "entamadores y con empléu nuevu", alvirtió. Tamién cree que tendría de falase espresamente de la concertación social.

Iglesias nun ta d'acuerdu con una posible supresión de conceyos, nin cola desapaición de la Procuradoría. En tou casu, agradez que nun se mente la construcción d'una incineradora n'Asturies, algo qu'interpreta como un deséu espresu pa nun meter el deu nel "güeyu" a IU.

A IU preocúpen-y cuestiones como la sanidá o la educación, y como vien recoyíu nel acuerdu de PSOE-UPyD, que fala, por exemplu, de la reordenación de los centros sanitarios, y que caltién "en planu d'igualdá" a la rede pública educativa y a la privada.

CPFF

Iglesias considera que "ta cantao" que na xunta del Conseyu de Porítica Fiscal y Financiera (CPFF) d'esti xueves va refugase'l plan económicu financieru qu'envió l'Executivu de Cascos. "Agora tienen otra escusa más, porque yá se perfila otru Gobiernu distintu al que mandó'l documentu", señaló.

Por eso insistió na importancia del nuevu plan que va haber qu'enviar correxíu a Madrid per parte del nuevu Gobiernu y que tendría qu'incluyir les nueves prioridaes.