Javier Fernández espera que'l Gobiernu central seya flexible colos plazos pa ellaborar un nuevu plan d'axuste

UVIÉU, 18 de Mayu (EUROPA PRESS)

El candidatu del PSOE a la presidencia d'Asturies, Javier Fernández, que ganó l'apoyu d'IU y UPyD pa la investidura la próxima selmana, dixo esti vienres que confía en que'l Gobiernu central seya flexible nos plazos pa ellaborar un nuevu plan d'axuste, una vez que'l qu'enviara'l Gobiernu de Foru se refugara nel Conseyu de Política Fiscal y Financiera d'esti xueves.

D'equí p'alantre, Asturies tien quince díes pa ellaborar un nuevu plan d'axuste. Pero Javier Fernández señala que si esi plazu nun ye abondo, el Gobiernu tendría qu'amplialo. Él ta dispuestu a trabayar yá dende'l xueves, al otru día a la so probable investidura, na materia porque lo considera un llabor "inmediatu".

A Fernández prestaría-y cumplir el plazu. Pero señala que'l so oxetivu ye facer un plan "rigorosu" y nun sabe si ye posible facelo nesi tiempu. "Espero que si en llugar de 15 díes el plazu ye un mes, el Gobiernu d'España lu entienda", dixo. Y recordó que'l Gobiernu de Mariano Rajoy tardó cuatro meses en presentar les sos cuentes públiques. "Nós nun pretendemos tanto nin tanto", apuntó.

Asina, esplicó qu'Asturies supón el 2,2% del Productu Interior Brutu (PIB) d'España, polo que si'l plazu se prollonga a un mes nun se pondría en peligru'l procesu de consolidación fiscal de les comunidaes autónomes.

"Independientemente que mos preste o non la llei d'estabilidá nun ye una opción pal gobiernu que yo presida nun cumplila", señaló Fernández, que dixo que los oxetivos son qu'Asturies tenga un límite de déficit essti añu del 1,5%, del 1,1% nel 2013 y del 1% nel 2014.

Preguntáu sobre si puen llograse esos oxetivos sin tocar materies como sanidá y educación, Fernández pidió a los periodistes que-y permitan conocer antes la realidá presupuestaria d'Asturies. En tou casu, sí dixo que la sanidá y la educación "taríen na retaguardia qu'hubiera que tocar". La so intención ye acortar les consecuencies que pudieren tener los recortes nesos aspectos. Y nesti sen, dixo que tien un acuerdu d'IU que va nesi sen.