Javier Fernández (PSOE), únicu candidatu a la Presidencia al nun presentase Foru nin PP

EUROPA PRESS

UVIÉU, 21 de Mayu (EUROPA PRESS)

El secretariu xeneral de la FSA-PSOE, Javier Fernández, va ser l'únicu candidatu a la Presidencia autonómica, una vez acabáu esti llunes a les 10.00 hores el plazu de recepción de candidatures na Xunta Xeneral del Principáu.

A lo último, los líderes de Foru, Francisco Álvarez-Cascos, y PP, Mercedes Fernández, nun presentaron candidatures, pese a les intenciones apuntaes de primeres, mientres que l'aspirante del PSOE yá lo ficiera'l pasáu vienres.

El socialista, va relevar a Álvarez-Cascos al frente del Executivu, va contar colos apoyos de los cinco parlamentarios d'IU y va gobernar gracies al apoyu del únicu diputáu d'UPyD n'Asturies, Ignacio Prendes, col que selmana pasada algamó un pactu de lexislatura que dexa romper l'empate a 22 escaños ente les fuerces de la izquierda (PSOE-IU) y la derecha (PP-FORU).

El debate pa la elección de presidente va entamar esti martes a les 10.00 hores en sede parlamentaria cola intervención, sin límite de tiempu, del únicu candidatu. La sesión va volver a entamar 24 hores más tarde coles intervenciones de los cinco grupos, que van contar con un tiempu máximu de 45 minutos, con opción a retruque.

Fernández, que va salir investíu por mayoría en primer votación, va tomar posesión del so nuevu cargu de presidente esti sábadu, día 26, dos meses y un día dempués de les últimes elecciones antemanaes del pasáu 25 de marzu.