L'acusación del Bloque por Asturies de nun atender a un usuariu por falar n'asturianu yera contra'l 012 y non el 112

UVIÉU, 25 de Payares (EUROPA PRESS)

Bloque por Asturies acusó la selmana pasada por error al teléfonu d'urxencies de 112 de nun atender a un usuariu por falar n'asturianu. En realidá, el casu foi nel teléfonu 012, d'información al ciudadanu sobre l'Alministración autonómica. La organización unvió un comunicáu y una nota de disculpes al serviciu aludíu en primer instancia pero caltuvo los mesmos términos de la protesta contra'l segundu.

Según esplicó'l Bloque, el propiu director del 112 comunicóse col so responsable de Movimientos Sociales pa informalu de que "de magar la denuncia revisaron les grabaciones d'esi día pa poder determinar responsabilidaes, pero nun s'alcontró nada".

Bloque por Asturies volvió comunicase cola denunciante esplicándo-y la situación y pidiéndo-y que de dalguna manera confirmare que'l 112 foi'l númeru al que llamó. "La señora, dempués de comprobar el númeru, almitió la so confusión al tresmitimos la información", narró la carta. Foi al 012 al que realizó la respectiva denuncia.

Bloque por Asturies pidió disculpes públicamente al responsable del 112 César Álvare Avello, y al equipu de trabayadores, a la vez qu'agradeció "les molesties que se tomaron pa llendar responsbilidaes y evitar cualquier violación de los derechos de los ciudadanos, nesti casu los derechos llingüísticos".

De siguío, la ornganización dexó claro que "caltién firmemente la so denuncia", qu'anunció que treslladaría a los responsables del 012, "pa qu'entamen les aiciones pertienentes y d'esta manera s'evite de magar agora cualquier tipu de discriminación pol usu de la llingua asturiana".