L'arzobispu d'Uviéu cree que l'Obispu d'Alcalá ye "oxetu d'una ofensiva descalificadora de ciertos 'lobbies' gais"

UVIÉU, 18 de Mayu (EUROPA PRESS)

L'arzobispu d'Uviéu, Jesús Sanz Montes, considera que l'obispu d'Alcalá de Henares, Juan Antonio Reig Plá, "ta siendo oxetu d'una ofensiva descalificadora per parte de ciertos lobbies gais y de delles formaciones polítiques", tres el sermón que pronunció'l pasáu Vienres Santu na catedral complutense. Al traviés d'un comunicáu, el responsable de la Ilesia Asturiana mostró la so solidaridá col preláu madrilanu, que considera que dixo "lo que cualquier obispu podemos y tenemos que dicir en virtú de lo que pensamos"

Asina salió al tantu del discutiniu surdíu tres les afirmaciones de Reig, que nel so sermón, afirmaba lo siguiente: "quisiera dicir una palabra a aquelles persones llevaos por tantes ideoloxíes qu'acaben per nun orientar bien lo que ye la sexualidá humana. Piensen yá dende neños que tienen atracción hacia les persones del so mesmu sexu y, dacuando, pa comprobalo corrómpense y prostitúyense o van a clubes d'homes nocherniegos. Asegúrovos qu'alcuentren l'infiernu".

"El delitu" de Reig, según Sanz, "consiste en dicir qu'hai xente destruyida non pola homosexualidá, sinón pola vivencia desgarradora d'esa circunstancia, tan desgarradora qu'acaben destruyíos afectiva y sicolóxicamente". "Que quieran censurar a un obispu como Mons. Reig, que quieran escluyilu como si fuera un proscritu, por dicir lo que cualquier Obispu podemos y tenemos que dicir en virtú de lo que creemos, con respetu y con verdá, ye señal del cinismu hipócrita col que dellos representantes de les sos ideoloxíes con carné, pretenden asustar con amenaces como si fueren el 'Gran Xendarme' del personal", criticó l'arzobispu d'Uviéu, pal que "nun ye algo aisláu, sinón l'ataque frontal contra la Ilesia".

RESPETU A LOS HOMOSEXUALES

Manifiesta igualmente'l so respetu solidariu a "les persones homosexuales que nun quieren vivir en nengún infiernu d'escarniu y reprobación, nin en nengún infiernu de falsedá". Asina relató la so esperiencia de tratu con persones homosexuales, "que frecuentemente utilícenlos ideolóxicamente, persones llenes de dignidá que fueron oxetu de burles y que nun se sienten representaos por grupos de presión gai".

Sanz asegura que nos sos años d'estudios n'Austria y Madrid tuvo qu'atender a homosexuales que "veníen pidime ayuda nun momentu de confusión, de duda, de dolor, d'incomprensión ayena y d'incomprensión propia". "Persones llenes de dignidá que tienen que véseles con una situación complexa pa la que nun tienen palabres y qu'ellos mesmos nun acaben d'entender tantes coses que los enllenen d'interrogantes", definiólos.

"Llamábame l'atención cómo ellos nun banalizaben la so difícil situación, que tanto queríen una defensa de los sos derechos cuando nun yeren los sos derechos como persones lo que taba n'entredichu, cómo s'alloñaben tanto de los lobbies gais polos que nun se sienten representaos, como de los que-yos tán utilizando dende la ideoloxía de xéneru", calca l'arzobispu, pal que la realidá cotidiana d'estos homosexuales "ye tremendamente más dura y contradictoria que cuanto enseñen les caravanes de los díes del arguyu (¿?) gai".

Defende tamién "la postura doctrinal de la Ilesia católica sobre la homosexualidá", pues "recuerda les enseñances del catecismu de la Ilesia sobre esta condición humana, pa la que reclama, de la mesma, acoyida, respetu y delicadeza". "Los homosexuales nun tienen que ser oxetu de discriminación", afirma Sanz, qu'asegura que "lo que la Ilesia Católica piensa sobre la homosexualidá, recueye'l respetu grande qu'estes persones mos merecen".