Más de 40 planes d'axuste de conceyos asturianos pa pagar a proveedores aprobáronse yá

UVIÉU, 16 de Mayu (EUROPA PRESS)

Un total de 42 conceyos asturianos, de los 78 que componen la rexón, ellaboraron un plan d'axuste y sometiéronse a la operación d'endeUdamientu pa pagar a proveedores, baxo'l sistema del decretu aprobáu pol Gobiernu de midíes pal pagu de les deudes de conceyos y comunidaes autónomes. Namás un plan se refugó en Facienda, el del Conceyu de Parres.

Asina lo confirmó, en declaraciones a los medios de comunicación, el presidente de la Federación Asturiana de Conceyos (FACC), Antonio De Luis Solar, tres reunise col presidente de la Xunta Xeneral del Principáu d'Asturies, Pedro Sanjurjo. Solar esplicó que conceyos como El Franco, que teníen previsto acudir al fondu nun lo ficieron a lo último.

Antonio de Luis Solar dixo amás que yá s'agotó la incógnita del tipu d'interés aplicable'l próximu trimestre, qu'a lo último va ser del 5,9% y non del 7%, como se temía.

Nel casu de Parres, el presidente de la FACC esplicó qu'existe cierta "rocea" polo que puea asoceder. "Pidimos al Gobiernu que muestre algún instrumentu de collaboración pa los conceyos que tienen más dificultaes", señaló, esplicando que les midíes nun tendríen que sobrepasar la retención de la participación de los ingresos del Estáu. Esto ye, refuga cualquier tipu d'intervención que puea afectar a l'autonomía de los conceyos.

Polo que se refier a la xunta col presidente de la Xunta Xeneral, el representante de los conceyos treslladó-y el so interés na urxente formación d'un Gobiernu n'Asturies. Y Sanjurjo tresmitió-yos que ta too preparao pa que la próxima selmana yá haya Gobiernu. Asina, el presidente de la FACC pidió a tolos grupos políticos "collaboración" pa que seya asina.

Preguntáu sobre l'amenaza d'intervención a Asturies, De Luis Solar reclamó "responsabilidá" al Gobiernu central y al autonómicu en funciones porque ye algo que considera "bien preocupante". Asina, dixo qu'espera que'l conseyeru asturianu de Facienda, Ramón del Riego, presente nel Conseyu de Política Fiscal y Financiera un plan "afayadizu y rigorosu".