La matriculación na asignatura de Llingua Asturiana aumentó en más de 9.700 estudiantes na última década

UVIÉU, 7 de Mayu (EUROPA PRESS)

La matriculación na asignatura de Llingua Asturiana creció en más de 9.700 estudiantes nos últimos diez años, dende que'l Principáu asumiere les competencies educatives. Asina lo señaló güei en Mieres el conseyeru d'Educación, José Luis Iglesias Riopedre, qu'aseguró que nestos momentos esta materia ta "consolidada dafechu" na educación asturiana.

En concreto, según los datos apurríos pola conseyería, un total de 22.466 alumnos estudien esti cursu Llingua Asturiana, de los que 21.560 reciben les clases en centros de la rede pública y 906 na rede concertada.

La mayoría de los escolares, 17.763, tán cursando la materia na etapa de Primaria, mientres que'l restu pertenecen a Secundaria. En cuanto al profesoráu, na última década aumentó nel 63 por cientu el númberu de docentes qu'imparten Llingua Asturiana.

Estes cifres ofrecióles güei la Conseyería d'Educación mientres la celebración del actu escolar institucional de la XXXI Selmana de Les Lletres Asturianes.

Participaron nel eventu'l conseyeru y la directora xeneral de Política Llingüística, Consuelo Vega, que quisieron tar al par de los alumnos de distintos centros escolares del Principáu que ganaron los concursos de poesía, cartelismu y dibuxu. Mientres l'actu destacóse la importancia de la Llingua Asturiana na política educativa del Principáu y animóse a los más nuevos a siguir cursando esta materia.

Dende la Conseyería calcóse especialmente nel llabor que se ta faciendo pa promover la enseñanza del asturianu y, nesti sen, recordáronse les midíes que se desarrollaron nos últimos diez años.

El desarrollu de la Llei d'Usu, los planes de formación permanente del profesoráu o l'ampliación de los fondos bibliográficos d'asturianu nes biblioteques escolares son algunes de les iniciatives promovíes pol Principáu pa potenciar l'asignatura de Llingua Asturiana na comunidá.