Mercedes Fernández (PP) ve "inconcretu" el discursu del candidatu

UVIÉU, 22 de Mayu (EUROPA PRESS)

La vocera del PP na Xunta Xeneral d'Asturies (XXPA), Mercedes Fernández, dixo esti martes que'l discursu del candidatu socialista a la Presidencia, foi "inconcretu".

Nuna rueda prensa ofrecida tres la sesión plenaria n'escuchando al líder socialista, la diputada del PP agradeció-y el so "tonu tranquilu", pero dixo que la intervención del futuru presidente asturianu foi "plana" y "insuficiente", si lo que quería yera llograr confianza y treslladar ilusión.

"Nun pasó revista a los temes qu'ocupen y preocupen n'Asturies", señaló. Y criticó la "superficialidá política" de Javier Fernández por amparase en diagnósticos posteriores al dicir que tovía nun tien elementos de "xuiciu". Según Mercedes Fernández, el candidatu tendría que treslladar soluciones concretes. "L'enunciáu de los problemes sin dar soluciones faen un discursu insuficiente", repitió.

Merced Fernández nun considera una novedá que'l candidatu se comprometiera a cumplir la llei d'estabilidá presupuestaria. "Namás faltaría", indicó, añadiendo que la collaboración y cooperación col Gobiernu d'España ye "obligada". Amás, reprochó a Javier Fernández que nun ficiera público en qué se basa'l so acuerdu con IU. "Interésamos muncho", apuntó.

Preguntada sobre si'l Gobiernu central tendría que prollongar el plazu pa que'l Gobiernu d'Asturies presente'l so nuevu plan económicu financieru, Mercedes Fernández señaló que'l ministru de Facienda, Cristobal Montoro, yá se refirió a un plazu "improrrogable" pa que puea presentase, aprobáu pol Conseyu de Política Fiscal y Financiera (CPFF).

"Los plazos son abondo; o ganamos la batalla del tiempu o perdemos el futuru d'España", dixo Mercedes Fernández, que tamién se refirió a les crítiques del candidatu socialista a la derecha asturiana. A xuiciu de Mercedes Fernández, el candidatu socialista utiliza un llinguaxe "pasáu de moda" y "de los años 80" al falar d'izquierdes y dereches.